Европската унија треба решително да дејствува за да помогне да се стабилизира состојбата во Македонија, која има јасна европска перспектива, смета словенечкиот европратеник од Европската народна партија и претседател на парламентарната делегација за Македонија, Алојз Петерле.
– Меѓуетничката, меѓурелигиозната, пост-тоталитарната и поствоената природа на Балканот не треба да се потцени. Иницијативата да се вклучат двајцата главни политички лидери во разговори е добар знак дека правиме сè за кризата да не ескалира. Нашата посветеност треба да биде поширока и доследна, со ангажирање на највисоко политичко ниво додека не се постигне решение – изјави Петерле.
Словенечкиот европратеник вели дека Македонија направила значителен прогрес и оти во интерес на ЕУ е да се зачува европската перспектива на Балканот.
– Сметам дека билатералните проблеми треба да бидат решени во текот на пристапните преговори бидејќи чекалната не ја обезбедува европската трансформациска моќ, која е потребна за интеграција на Балканот во ЕУ – изјави Петерле.