Почна изградбата на пешачката патека во Гостивар по течението на реката Вардар. Патеката од малиот мост на Вардар, па сè до изворот во село Вруток е во должина од 10 километри, а широка е два метри.
– Оваа патека се гради по барање на граѓаните, каде гостиварци ќе може секојдневно да се рекреираат и да се релаксираат – изјави градоначалникот на Општина Гостивар, Невзат Бејта.
Според најавите, патеката, која се финансира од ИПА-фондовите на Европската унија, како дел од проектот за прекугранична соработка со косовската општина Драгаш, треба да биде целосно изградена за околу три месеци.
Општина Гостивар само минатата година, преку меѓународни фондови, има обезбедено средства за реализација на 40 проекти, чија вредност достигнува и до 10 милиони евра.