Од остатоците на рускиот авион, кој вчера се урна на Синајскиот Полуостров, досега се извадени 175 тела.
Во мртовечниците во Каиро веќе се испратени 163 тела, а оттаму со авион на руското министерство за вонредни ситуации, би требало вечерва да бидат пренесени во Санкт Петерсбург.
Во гратчето Ел Хасна, во чија близина се урна рускиот авион со 224 патници и членови на екипажот, веќе се пристигнати хеликоптери со претставници на руските министерства за вонредни ситуации и за сообраќај, како и на федералната агенција за цивилно воздухопловство. Во текот на денот се очекува и пристигнување на руски експерти, кои патуваат со автомобили до местото на несреќата.
За неколку часа се очекува да почне анализата на податоците од двете црни кутии, изјавија претставници на египетската влада.
– Дешифрирањето на црните кутии можеби ќе биде извршено во Египет, но конечна одлука за ова прашање сè уште не е донесена – изјави денеска раководителот на руската агенција за цивилно воздухопловство, Александар Нерадко.
Тој додаде дека вообичаено во вакви ситуации во анализата на податоците на црните кутии учествуваат експерти од двете земји.
Рускиот министер за транспорт, Максим Соколов, изјави дека црните кутии имаат претрпено помала штета.
Авионот на руската компанија „Когалимавиа“, кој тргна од Шарм ел Шеик за Санкт Петерсбург, се урна вчера околу половина час по полетувањето. Во несреќата нема преживеани.
Во Русија денеска е прогласен ден на жалост.
