Дежурен јавен обвинител од Основното јавно обвинителство Скопје вчера во село Волково констатирал дека со употреба на огнострелно оружје од живот се лишени три лица, од кои две од женски пол.
„Во насока на расветлување на настанот, обвинителот издаде наредби за вршење на обдукција на починатите, наредби за собирање траги од местото на настанот, вршење на ДНК-вештачење, фотографирање, како и за распит на лица со прибирање докази и податоци. Исто така, наредено е вештачење на телефоните пронајдени на местото на настанот, бидејќи според првичните информации, на кривичното дело претходела интензивна комуникација, која може да расветли детали за кривично-правниот настан“, велат од Основно јавно обвинителство.
Обвинителот издал и наредба до Внатрешна контрола при МВР за испитување на случајот и за доставување на целосен извештај за минатото поведение на починатиот маж.
Од обвинителство велат дека првичните сознанија упатуваат дека мажот извршил двојно убиство и самоубиство, а мотивите дополнително ќе се утврдуваат.