Извршниот одбор на НСДП на вчерашната седница донел одлука со која го поздравува договорот за поматамошна реализација на обврските преземени од опозицијата и од владејачките партии со Договорот од Пржино. Од партијата изразија поддршка на кандидатите за министри и за заменици-министри од редот на коалицискиот партнер, СДСМ.
„Комплетирањето на тимот на специјалниот јавен обвнител и обезбедувањето на сите услови за нормално функционирање на Специјалното обвинителство, дава висока гаранција дека ќе се почне со процес на расчистување на криминалот и на политичката корпуција која речиси десет години, вкоренета во владејачката структура, го разградуваше демократското ткиво на Македонија. По оставките на најлојалните и клучни политички играчи на Груевски, кои беа и најчесто споменувани во прислушуваните разговори како носители на криминал, корупција, како иницијатори и извршители на уцени, закани, судски местенки, сосема логично е македонската јавноста да очекува и нивниот налогодавач наскоро да си замине од премиерската функција“, се вели во соопштението од партијата.
Од НСДП очекуваат по постигнувањето на договорот, финализирањето на неговата содржина во Собранието и по целосното имплементирање, вклучително и организацијата на фер и слободни избори на 24 април следната година, во државата да почне процес на демократизација и на морален препород во сите сфери на општествениот живот, односно нормализација на состојбите во судството, медиумите и во јавните институции.