Пратеникот од Независни Грци, Костас Зурарис, изрази огорченост од одлуката на СИРИЗА и на други грчки партии да се прифати сложено име во кое ќе фигурира терминот „Македонија“. Според него, тоа ќе значи дека Грција ќе дозволи нашите граѓани да бидат главните Македонци, а грчките граѓани од северна Грција, кои се идентификуваат како Македонци, некакви Македонци од втор степен.
– Фактот што државата, односно мнозинството политички партии, освен јас и Независни Грци, имаат одлучено да прифатиме сложено име со географска одредница, значи дека главните Македонци ќе бидат тие, односно Македонците од Македонија. Јас, што сум од Солун, и моите „земјаци“ што ќе бидеме? Ние ќе бидеме за малку Македонци? Второтстепени? Значи, и јас како солунчанец сум скопјанец, секако – истакна Зурарис, изразувајќи отворено незадоволство и одбивање на грчката црвена линија за сложено име ерга омнес, во кое ќе стои името Македонија.
Спорот за името и понатаму останува тема што ги разделува СИРИЗА и Независни Грци и покрај нивната соработка за економските и за финансиските прашања.
