Претседателот на Република Македонија, Ѓорге Иванов, откако денеска гласаше на избирачкото место во гимназијата „Јосип Броз Тито“, изрази надеж дека изборите ќе минат во мирна, демократска и фер атмосфера и оти поразените ќе го признаат легитимитетот на избраните.
– Очекуваме наскоро да се конституира новиот состав на Собранието, да се избере влада и владата да ги исполни сите ветувања што ги даде во предизборниот период. Очекуваме конечно да излеземе од политичката криза и да се посветиме на нашите стратегиски цели, да ја вратиме евроатлантската агенда на највисокото место, да биде приоритет на државата – рече Иванов.
Тој порача дека настаните што се случија во изминатите години треба да бидат поука за сите.
– Свесни сме и за сите предизвици во регионот и пошироко. Затоа ни се неопходни институции со полн капацитет, кои ќе се справуваат со сите предизвици – додаде Иванов.