Во Полициската станица во Гостивар, вчера во 10 часот, 57-годишниот М.С. од гостиварското село Калиште, вработен како овчар кај Џ.И. од село Страјане, пријавил дека на 7 октомври 2016 година, околу 12 часот, додека ги напасувал овците во атар на селото Страјане, две непознати лица извршиле разбојништво врз него.
Додека се ракувале со пријавувачот, како соопшти денеска МВР, едниот од нив го сопнал и го соборил на земја, по што му ги врзале рацете со јаже и со закана со нож му побарале пари. Сторителите извршиле претрес над М.С. и од внатрешните џебови од палтото му одзеле паричник во кој имал еден клуч од стан, околу 150 евра во разни апоени и мобилен телефон. Потоа сторителите го однеле врзаниот М.С. до шумата, каде што едниот од нив го удрил неколкупати со тупаници во пределот на вратот и по телото, а потоа го оставиле и си заминале. По кратко време М.С. успеал да ги одврзе рацете и се упатил во селото.
Полицијата презема мерки за пронаоѓање на сторителите и за целосно расчистување на случајот.
