Најмалку 15 лица загинаа, а десетина се ранети денеска во напад на исламисти врз хотел во сомалискиот главен град Могадишу, соопшти сомалиската полиција.
Според телевизијата „Ал Џезира“, во нападот загинале 15 лица, а ранети се десетина.
Нападот почнал со експлозија на автомобил-бомба, активирана од бомбаш-самоубиец пред вратата на хотелот „Сахафи“. Потоа во објектот упаднале вооружени мажи, кои отвориле оган кон луѓето во хотелот. Следела втора експлозија, надвор од хотелот, веројатно од автомобил паркиран пред зградата.
Во нападот загинале еден сегашен и еден поранешен член на парламентот и фоторепортер.
Според сомалиската полиција, екстремистите, кои сè уште се во објектот, зеле заложници, а во хотелот сè уште се слушаат истрели.
Одговорноста за нападот ја презеде групацијата Ал Шабаб.
