Министерството за внатрешни работи (МВР) денеска преку соопштение информираше дека дел од уапсените во полициската акција во Куманово ја потврдиле инволвираноста во нападот на полициската станица во Гошинце на 21 април и го посочиле местото на кое го сокриле оружјето украдено од караулата.
„Врз основа на добиено оперативно сознание, на 10 мај беа извршени претреси на две локации во Малино маало, село Брест, на отворен простор, во импровизирани бункери. При претресите пронајдено е поголемо количество оружје и муниција“, стои во соопштението од МВР.
Како што информираат оттаму, при претресите биле најдени вкупно 61 парче автоматско оружје, односно:
- 21 автоматска пушка од украинско потекло,
- 35 автоматски пушки од југословенско потекло
- 1 автоматска пушка од кинеско потекло,
- 1 полуавтоматска пушка
- 3 пушко-митралези,
- 8 сандаци со муниција калибар 7,62 од кои 7 се пломбирани сандаци со муниција и еден отворен.
„Од првично направените проверки, утврдено е дека од вкупно 59 парчиња автоматско оружје, кои имале јасни и видливи сериски броеви, 54 пушки со сериски број се сопственост на МВР на РМ, односно оружјето кое било одземено од криминално-терористичката група од полициската станица за граничен надзор Гошинце на 21 април 2015 година“, стои во соопштението на МВР, во кое се додава дека пронајдената муниција дополнително ќе се вештачи, за да се утврди дали се работи за истата што била одземена од караулата Гошинце.
