„Добро е што вчера се дојде до договор меѓу политичките партии. Тоа, пред сè, е добро за државата за што е можно побргу да има избори и да се стави крај на политичката криза во Република Македонија предизвикана од опозицијата“, оцени денеска во Прилеп лидерот на ВМРО-ДПМНЕ, Никола Груевски.
Тој се надева дека, како што рече, овојпат опозицијата нема да бара повторно алиби за нови одложувања или бојкотирања на изборите.
– Знаеме дека СДСМ има богата историја на одбегнување избори и на барање алиби за бојкотирање избори. Затоа е многу важно вчерашниот договор да се спроведе и да се имплементира, за да немаме повторно обиди на опозицијата во фаза на имплементација да одбегне нешто или да пролонгира. Се надевам дека овојпат ќе изиграат чесно и дека навремено ќе се спроведе сè што е договорено за да може оваа година да се одржат избори и да му се даде можност на народот да си го каже своето мислење – рече Груевски одговарајќи на новинарско прашање.
Според лидерот на ВМРО-ДПМНЕ, време е народот да се изјасни чија политика и која гарнитура ја поддржува.
– Сега е време да се даде повторно можност на народот да каже која политика ја поддржува и кој начин на работење го поддржува, односно која политичка партија ја поддржува и која политичка гарнитура. Нè слушнаа нас, нè видоа нас, ги слушнаа нив, ги имаат добро видено и нив, така што време е да се даде можност народот да одбере по завршување на политичката криза како Македонија да се движи во наредните четири години – рече Груевски.
