„Она што синоќа се случи во Берлин, Германија го разбира како терористички напад. Би било одвратно ако убиецот е некој кој како мигрант добил заштита од Германија“, изјави германската канцеларка Ангела Меркел по синоќешниот напад во Берлин, зад коj, според првичните информации на германските власти, стои мигрант од Пакистан.
Таа истакна дека е згрозена од тоа што синоќа се случи на Брајтшедплац во Берлин.
– И јас, како и милиони луѓе во Германија, сум шокирана, згрозена и длабоко погодена од овој терористички чин. Дванаесет невини луѓе ги изгубија животите, додека десетина се во критична состојба – додаде Маркел.
На новинараско прашање дали по овој настан Германија ќе ја промени политиката кон мигрантите, Меркел истакна дека се противи на тоа.
Синоќа, Пакистанецот Навед Б. (23) со камион влета во штандовите на божиќниот базар во Берлин, при што најмалку 12 лица загинаа, а повеќе од 50 се повредени.
