Либиската влада побара помош од другите земји за одбрана од напредувањето на екстремната џихадистичка организација Исламска држава и ги предупредила од опасноста на повторување на истото сценарио како во Ирак.
– На либиските градови им се заканува сè поголема опосност од оваа организација и ќе биде тешко да им се спротивставиме како во Ирак. Изненадени сме од тоа што меѓународната заедница не зазема цврст став за она што се случува во Либија – изјави премиерот Абдалах Тани на конференција за новинари.
Тани го повторил барањето за укинување на меѓународното ембарго на оружје, кое е на сила од 2011 година, кога од власт беше симнат долгогодишниот лидер Моамер Гадафи.
Премиерот на меѓународно признатата либиска влада објаснил дека во Либија е потребно оружје за да се поразат џихадистите од Исламска држава кои имаат заземено делови од Ирак и од Сирија.
ИД во Либија го зазела аеродромот во Сирт, родното место на Гадафи, источно од Триполи, откако минатата недела оттаму се повлекоа силите на либиската влада.