Група од Кочани се специјализирала за кражби по црквите и за три месеци сторила 14 кражби. Полицијата ги откри, меѓутоа, свештениците од Брегалничката епархија се сомневаат дека продолжиле со „бизнисот“ бидејќи пред два дена, на ист начин како и претходните цркви, бил ограбен храмот „Свети Климент“ во Штип.
Биле украдени околу 6.000 денари кои останале во касата. Црквата е осветлена, поставени се и безбедносни камери, но тоа не ги спречило крадците да влезат. Ова е втора кражба во еден месец во Штипско.
Протајерејот Николче Ѓорѓев вели дека поголема штета е направена при влегувањето на крадците во црквите.
– При претпоследната кражба во црквата во селото Крупиште, крадците однеле 300 денари, но направија штета од 6.000 денари. Со завчерашната кражба штетата на црквата е 15.000 денари – изјави Ѓорѓев.
Црквите во источниот регион се постојана мета на крадци, кои влегуваат поради парите од верниците. Кражбите не престануваат и покрај тоа што речсиси во сите поголеми цркви Брегалничката епарија постави безбедносни камери, а некаде има и чуварска служба.
Како превентива, свештениците се должни секојдневно да ги внесуваат парите во банка, што треба да ги поколеба крадците.
