Културното наследство ни ја дава основата на заедништвото, заедничката припадност во рамките на Европа, бидејќи ние споделуваме заедничка повеќемилениумска испреплетена традиционална култура која резултира со сегашните позитивни процеси на промовирање на истата, ова го посочи министерката за култура, Бисера Костадиновска-Стојчевска на денешниот Министерски состанок на промоција на Првата министерска платформа на Западен Балкан за култура во Тирана, Албанија.
На министерската платформа за култура денес во Тирана учествуваа министрите од земјите од Западен Балкан каде ги истакнаа предизвиците со кои се соочуваат со младите и културното наследство.
Преку платформата ќе се овозможи негување на културното наследство и таа е важна за заедничко делување на земјите во културата.
Според Костадиновска-Стојчевска преку развивање на програма на размена на млади луѓе од цела Европа, кои ќе ги презентираат културните традиционални особености – културно наследство, разноликости и вредности на земјата од која доаѓаат ќе се придонесе уште повеќе за запознавање со истите и промовирање на вредностите на заедничка културолошка припадност.
„Во минатото, поради одржливоста, беше постигнат напредок на цивилизацијата. Стручните профили како кустос, конзерватор, документарист, фолклорист, филмолог, токму овие професии ни дадоа можност да ја разбереме сегашноста, преку истражување и заштита на вредностите од минатото, а обезбедивме и патоказ за иднината. Tокму затоа преку Годишните отворени повици, Министерството за култура ги охрабрува младите и младинските здруженија да овозможат проекти во областа на културното наследство“, рече министерката за култура.
На самитот, таа порача дека развивањето на свеста за заштитата на културното наследство како дел од секојдневниот живот треба да започне од најмладата возраст. Таа свест мора да се развива како потреба на локално и пошироко државно ниво. Културата нетреба да биде сувенир туку економски фактор, а треба да се инвестира во образованието уште од најмала возраст сè со цел да се развие свеста кај младите за културното наследство.
Министерскиот состанок е клучен настан во заедничките напори за одржување на политичкиот моментум поттикнат од започнувањето на Агендата за Западен Балкан организиран од страна на Марија Габриел, европска комесарка за иновации, истражување, култура, образование и млади.
