Ве охрабрувам да ги пријавите сите притисоци, заплашувања, повреди на слободата на определување што се поврзани со изборниот процес, рече Александар Кирацовски, дополнителен заменик-министер за информатичко општество, на денешната прес-конференција, на која го најави проектот „Пријави притисок за фер избори“.
– Сите неправилности ќе може да ги пријавите анонимно на адресата www.dzm-mioa.mk и на телефонскиот број 02/ 3200955. Целта на овој проект е да се мотивираат сите вработени во администрацијата да пријават закани и да се обесхрабрат функционерите на ВМРО-ДПМНЕ да вршат какви било притисоци – рече Кирацовски.
Тој додаде дека тие што ќе се закануваат и ќе уценуваат или ќе прават притисоци врз вработените во администрацијата, можат да добијат и затворска казна до три години. Ако, пак, лице вработено во јавната администрација врши ваков вид казниви дела, казната за него може да биде и до пет години.
