Во Општина Центар ќе се гради ново основно училиште, најави денеска градоначалникот на општината, Андреј Жерновски.
Училиштето ќе се изгради во Капиштец, на улиците Васил Ѓоргов и Адам Мицкијевиќ, и ќе се простира на 10.600 квадратни метри, со планирана површина за градба на објектот од 3.142 квадратни метри.
– Проектот е изработен за да ги задоволи сите стандарди за современо образование. Училиштето ќе биде изградено со примена на современ архитектонски израз и на високо-квалитетни материјали. Ќе се учи преку интерактивни табли, учениците ќе поседуваат таблети, поврзани со безжична интернет-мрежа. Кабинетите ќе бидат опремени со најсовремена опрема, неопходна за квалитетно образование на децата. Греењето ќе биде подно и во секоја училница ќе има спроведено вода. Во зимски услови, водата во тоалетите ќе се грее преку топлопната мрежа, со што ќе се постигне идеална температура во просториите – рече Жерновски.
Училиштето ќе има соодветен пристап за лица со посебни потреби, до и во внатрешноста на објектот. Ќе има заштитна тампон-зона меѓу влезот во училиштето и околните сообраќајници, со обезбедено паркиралиште за посетителите и за родителите, а ќе има и подземни премини до училиштето.
До 10 декември сите објекти на просторот каде што ќе се гради новото училиште ќе се иселат, а од 10 декември започнува расчистувањето на теренот за изградба на првото училиште во Капиштец.
