fbpx

Како фотографија од Словенија стара 12 години стана руски доказ за „валканата бомба“ на Украина

-

Словенечката влада официјално реагираше  дека фотографијата која  руското Министерство за надворешни работи ја користи во својата објава на Твитер, е фотографија на Агенцијата за радиоактивен отпад на Словенија (АРАО) од 2010 година. Во реакцијата на словенечката влада  е пренесена и изјавата на  Санди Вршек, директор на АРАО, во којашто се вели „Радиоактивниот отпад во Словенија се складира безбедно и под надзор. Не се користи за правење валкани бомби“, пишува „Вистиномер“ во својата анализа.

Текстот подолу го пренесуваме во целост:

Фотографија од Словенија од 2010 година деновиве се најде во барабанот на руската дезинформациска реторика за војната во Украина. Руското Министерство за надворешни работи ја (зло)употреби фотографијата од радиоактивен отпад објавена пред 12  години од Агенцијата за радиоактивен отпад на Словенија (АРАО),  за да го поткрепи обвинувањето дека Украина се подготвува да употреби „валкана бомба“, експлозивна направа што содржи радиоактивен материјал.

Руско Министерство за одбрана: Според информациите со кои располагаме, две организации во Украина имаат конкретни упатства за создавање на таканареченатавалкана бомба“. Работите се во завршна фаза, објави на Твитер Министерството за надворешни работи на Русија на 24 октомври и во прилог на оваа изјава од МО, како своевиден „крунски доказ“ ja прикажа и споментата фотографија.

Ваквата изјава на Министерството за одбрана на Русија заедно со фотографијата  истиот ден (24.10.2022) беше објавена и на официјалната Фејсбук страница на амбасадата на Русија во С. Македонија. Во овој пост на руската амбасада во Скопје уште се појаснува што всушност претставува „валканата бомба“, којашто наводно Украина планира да ја употреби:

Потсетиме дека „валканата бомба“ е контејнер со радиоактивни изотопи и експлозивно полнење. Кога полнежот е детониран, контејнерот се уништува, а радиоактивните материи се прскаат со ударен бран, создавајќи радиоактивна контаминација на областа на големи површини, а исто така може да доведе до зрачење болест.

Според плановите на режимот во Киев, детонирањето на таква муниција може да се „маскира“ како непредвидена работа на руска нуклеарна муниција со низок принос, во која како полнење се користи високо збогатен ураниум. Присуството на радиоактивни изотопи во воздухот ќе го евидентираат сензорите на Меѓународниот мониторинг систем инсталиран во Европа, со последователно обвинување на Руската Федерација за употреба на тактичко нуклеарно оружје.


Подоцна во текот на истиот ден (24.10.2022) руското Министерство за надворешни работи  имаше уште еден твит на оваа тема.

Режимот во Киев планира да ја камуфлира експлозијата на овој вид убојни средства под извонредниот ефект на руската нуклеарна боева глава со мала моќност која во своето полнење содржи високо збогатен ураниум.

 

 

Во врска со споменатата фотографија, пак, наредниот ден, 25 октомври, официјално реагираше словенечката влада.

Фотографијата која руското Министерство за надворешни работи ја искористило во својата објава на Твитер (https://twitter.com/mfa_russia/status/1584547788335251462), е фотографија на АРАО од 2010 година, стои објавата на официјалниот Твитер профил на Владата на Словенија.

Словенечките власти, исто така, појаснуваат дека фотографијата се користела за професионални презентации  и како информативни материјали за пошироката јавност. Оттаму посочуваат и дека:

На фотографијата се прикажани детектори за чад кои се предмет на општа употреба.

Тие содржат радиоактивен извор, но не и некој од радиоактивните извори наведени во табелата под фотографијата. Фотографијата е објавена без знаење на АРАО.

Во реакцијата на словенечката влада  е пренесена и изјавата на  Санди Вршек, директор на АРАО, во којашто се вели:

Радиоактивниот отпад во Словенија се складира безбедно и под надзор. Не се користи за правење валкани бомби.

 

 

Русија во вторникот (25.10.2022) пред Советот за безбедност на Обединетите нации ја обвини Украина дека се подготвува да употреби  експлозивна направа со радиоактивен материјал, таканаречената „валкана бомба“

Ние сме прилично задоволни затоа што ја подигнавме свеста. Не ми пречи ако луѓето кажат дека Русија крева лажна тревога ако тоа не се случи бидејќи ова е ужасна, ужасна катастрофа што потенцијално и се заканува на целата Земја, изјави заменик-амбасадорот на Русија во ОН, Дмитриј Пољански.

Сепак, за ваквите обвинувања кон Киев, Москва не обезбеди докази.

Не видовме ниту слушнавме никакви нови докази…. Ова е чиста руска дезинформација што ја видовме многу пати досега и треба да престане, изјави заменик-амбасадорот на Велика Британија во ОН Џејмс Кариуки.

Украина ги отфрли руските наводи дека украинските сили би можеле да активираат радиоактивна направа и ја обвини Русија дека планира да изврши таков чин, a потоа да ја обвини Украина.

Украинскиот претседател Володимир Зеленски за време на неговото ноќно обраќање во неделата (23.10.2022) рече дека Русија е единствената во регионот способна да користи нуклеарно оружје.

Ако Русија се јави и каже дека Украина наводно подготвува нешто, тоа значи едно: Русија веќе го подготвила сето ова, рече Зеленски..

Западните земји, исто така, ги отфрлија руските наводи како обид за ескалација на осуммесечната војна.

Генералниот секретар на НАТО Јенс Столтенберг  порача (27.10.2022) дека руските недокажани тврдења дека Украина планира да употреби „валкана бомба“ се очигледно лажни и Кремљ не смее да ја користи како изговор за ескалација на војната.

Русија сега лажно тврди дека Украина се спрема да употреби радиоактивна валкана бомба на својата територија. Сојузниците од НАТО го отфрлаат ова очигледно лажно тврдење. Русија често ги обвинува другите за она што самата планира да го направи. Го гледавме тоа и претходно, од Сирија до Украина. Русија ова не смее да го користи како изговор за ескалација на војната, кажа Столтенберг.

Притоа тој  ги нарече руските тврдења неодговорни.

Какво било користење нуклеарно оружје во Украина моментално ќе ја смени природата на конфликтот“, кажа Столтенберг. „Претседателот (на Русија Владимир) Путин знае дека во нуклеарна војна нема победник и никогаш не смее да се води. Во Москва знаат и дека такво нешто би предизвикало тешки последици.

 

***

Овој напис е изработен во рамките на проектот Промовирање на пристап до веродостојни вести за борба против дезинформации, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.

Нашите вести во вашето сандаче

Секој ден во 17 ч. добивајте ги вестите од Новинската агенција Мета директно на вашата електронска адреса.

Ве молиме одберете на кој начин сакате да добивате информации од нас:
Можете да се отпишете од оваа листа преку линкот на крајот од нашите пораки.

Украинската одбрана соборила 84 руски воздушни цели

Ноќеска Русија изврши уште еден масовен воздушен напад врз украински објекти за гориво и енергија, соопшти украинската одбрана. Непријателот ја нападнал Украина со 60 беспилотни летала Шахед и 39 проектили...