Претседателот на Република Македонија, Ѓорге Иванов, по повод Новата 2016 година, даде помилување на 174 осудени лица, од кои 54 целосно, а 120 делумно се ослободуваат од понатамошно издржување на казната затвор.
Претседателот на Република Македонија со помилување дава ослободување од гонење или целосно или делумно ослободување од извршување на казната, ја заменува изречената казна со поблага казна или со алтернативни мерки, или определува бришење на осудата, или ја укинува, односно определува пократко траење на определена правна последица од осудата или на казната. Со помилувањето може да се определи укинување или пократко траење на овие казни: забрана на вршење професија, дејност или должност, забрана на управување со моторно возило на сторителите кои се возачи по занимање и протерување на странец од земјата.
