Претседателот на Република Македонија, Ѓорге Иванов, по повод одбележувањето на Денот на наставата на турски јазик, 21 декември, упати честитка до припадниците на турската заедница во Република Македонија.
„Честитајќи ви го денешниот празник, сакам да го истакнам значењето на образувањето на мајчиниот јазик, кое е важно во негувањето на основните обележја на еден народ. Тоа го зајакнува и го чува националниот и културен идентитет, овозможувајќи им на нашите сограѓани да ги негуваат своите културни и верски традиции. Република Македонија претставува раскошен мозаик во кој живеат различни народи кои зборуваат на различни јазици и живеат различни култури. Живееме заедно, градејќи заедничка иднина на соживот, еднаквост и на почит“, стои во честитката од Иванов.
Тој го истакна придонесот што турската заедница го дава за развојот на земјава.
„Турската заедница е значаен дел од македонското мултиетничко општество кое се темели на доверба и на заедништво. Република Македонија гледа голем пријател и сојузник во Република Турција. Отворената и постојана политичка поддршка меѓу двете земји влијае на развојот на добрите културни и економски односи. За тоа сведочат голем број реализирани проекти и инвестиции во различни области“, се додава во честитката од Иванов.