Истекувањето на гас од цевководите „Северен тек“ во Балтичкото Море има значително влијание врз емисиите на стакленички гасови во Шведска, пренесува германската новинска агенција ДПА.
Истекувањето гас во економската зона на Шведска изнесуваше околу 5,8 милиони еквиваленти на CO2, објави Шведската агенција за заштита на животната средина. Ова одговара на околу 11 проценти од вкупните домашни емисии на Шведска во 2022 година, за кои скандинавската земја ја извести Европската Унија и Обединетите нации.
Без истекувањата, емисиите на Шведска во 2022 година би се намалиле за околу 5 отсто во споредба со 2021 година, но со нив тие се зголемиле за околу 7 отсто. Сепак, ова нема да влијае на способноста на Шведска да ги постигне своите климатски цели до 2030 година, се вели во извештајот.
Гасоводите транспортираа руски гас во Германија пред Русија да ја започне својата целосна инвазија на Украина на 22 февруари 2022 година.
Седум месеци подоцна, на 26 септември, беа регистрирани експлозии во близина на данскиот остров Борнхолм, а брзо потоа, беа откриени четири истекувања во три од четирите гасоводи „Северен тек“, од кои два беа во шведската и данската ексклузивна економска зона.
Во ноември 2022 година, канцеларијата на шведскиот јавен обвинител го потврди сомнежот дека ова е саботажа од самиот почеток – но сè уште не е јасно кој е одговорен.
Според властите, околу 96 отсто од истечениот гас бил метан. Метанот и другите стакленички гасови кои ја оштетуваат климата се претвораат во CO2 – таканаречени CO2 еквиваленти – за подобра споредливост. За пресметување на дистрибуцијата на истечениот гас е користен посебен метод, соопшти агенцијата.
