Грчкиот долг, геостратешката улога на Грција, бегалската криза и кипарското прашање се очекува да бидат главните теми на разговорите на американскиот претседател Барак Обама со грчкиот државен врв. Обама пристигнува утре во Атина и ќе се сретне со грчкиот претседател, Прокопис Павлопулос, и со премиерот Алексис Ципрас, а вечерта ќе има средба во претседателската палата, на која ќе присуствува и министерот за надворешни работи, Никос Коѕиас, но и другите лидери од грчките политички партии.
Претседателот на САД во среда можно е да го посети Акропол и ќе одржи говор од културниот центар „Ставрос Ниархос“, а потоа ќе замине за Берлин.
Обама и во интервју за весникот „Катимерини“ посочи дека продолжува да ги поддржува напорите за реформи во Грција и олеснување на грчкиот долг. Надежите на грчката влада се Обама да изрази одново силна поддршка за Грција и намалување и реструктуирање на грчкиот долг, за да се олесни финансискиот товар на грчкиот народ. Грција смета дека благодарение на интервенцијата на Обама кај германската канцеларка Ангела Меркел, Грција сè уште е дел од еврозоната.
– Мојата посета е можност да ја повторам поддршката на САД за реформи кои ќе ја подобрат инвестициската клима и кои ќе осигураат дека нема да се појават проблемите кои ја предизвикаа кризата и ќе постават темели за силно економско закрепнување. ММФ има кажано дека кратењето на долгот е клучно за грчката економија да се врати во одржлива насока. Затоа и продолжувам да апелирам до кредиторите да ги преземат сите неопходни чекори за да се осигура дека Грција ќе биде во можност да се врати во здрав економски развој, вклучувајќи ја и мерката за суштинско намалување на долгот – вели Обама за весникот „Катимерини“.
Проценките се дека Обама ќе испрати јасна порака дека е неопходно реструктуирање на долгот и дека таа порака и притисок потоа директно ќе ги пренесе и во разговорите со Меркел во Берлин. Оваа поддршка Грција смета дека ќе е клучна во пресрет на преговорите со тројката, кои од денеска во Атина ги продолжуваат средбите со грчките министри.
Спорот за името меѓу Македонија и Грција, според грчките аналитичари, не се очекува да се најде на агендата на оваа значајна средба за грчката влада. Можно е да се разговара за кипарското прашање, чие решавање Обама во интервјуто за „Катимерини“ вели дека го поддржува.
Американскиот претседател се очекува да ја поддржи Грција и да ѝ се заблагодари за начинот на кој се справува со бегалската криза, како и да ја истакне нејзината геостратешка вредност, особено поради американската воена база во Суда.
Обама во интервјуто за „Катимерини“ истакна и дека е неопходна соработка во борбата против тероризмот, ИСИС и режимот на Асад во Сирија, а забележува и дека за САД е од голема важност соработката со Грција во НАТО бидејќи и покрај финансиската криза, грчките воени сили остануваат посветени на мисијата на Алијансата.
Поради посетата на Обама, Атина е под силни безбедносни мерки. Во центарот утре и задутре строго се забранети протести и собири, а центарот ќе биде обезбеден од 5.000 полицајци и од неколку стотици американски тајни агенти. Хотелот на Обама се чува во тајност, а обезбедување ќе има и околу три луксузни хотели во јужните предградија на Атина, меѓутоа без да се посочи точно во кој ќе претстојува американскиот претседател.