Домашната економија во 2015 година забележа пораст така што, во согласно со проценетите податоци, домашниот бруто-производ се зголеми за 3,7 отсто, што претставува речиси идентичен износ со 2014 година, објави Народна банка.
– Во споредба со 2014 година, најзначајна промена во придонесот кон годишниот пораст имаше градежништвото, по што следуваа трговијата, транспортот и угостителството, додека новите капацитети ориентирани кон извозот и понатаму се значајна карактеристика на македонската економија – се вели во соопштението на Народна банка.
Оттаму додаваат дека дефицитот на тековната сметка на билансот на плаќања и во 2015 година беше на умерено ниво, не упатувајќи на поголеми нерамнотежи во надворешниот сектор.
– Порастот на паричната маса и на кредитната активност на банките продолжи и во текот на 2015 година. Во услови на понатамошно закрепнување на економијата, поволни движења на пазарот на труд, како и релативно високи приливи врз основа на приватните трансфери, во 2015 година се забележува солидно зголемување на паричната маса М4 и на депозитната база на банкарскиот систем. Ваквите остварувања беа дополнително поткрепени со зголемената кредитна активност – се додава во соопштението на банката.