Амбасадорот на ЕУ во Скопје, Дејвид Гир денеска изјави дека за пристапниот процес во ЕУ мора да има согласност меѓу сите политички партии во земјава, како одговор на новинарско прашање во врска со фотографијата што се појави од опозицискиот лидер Христијан Мицкоски како влегува во седиштето на ЕУ-инфо центарот во Скопје.
„Секако одржуваме добри контакти со сите партии кои тврдат дека се посветени кон европската иднина на оваа земја со оглед на тоа дека реформите зависат од соработката меѓу поделените страни. Нема да навлегувам во детали“, изјави евроамбасадорот Гир, додавајќи дека на сите дискусии секогаш кажуваат дека стратешки интерес на ЕУ и на земјава е нејзиното побрзо приклучување кон Унијата.
Тој додаде дека реформите треба да напредуваат брзо во земјава, оценувајќи дека има напредок во некои области и институции.
Сепак, Гир дополни дека суштински елемент во пристапувањето на една земја во ЕУ се реформите во правосудството и владеењето на правото. Евроамбасадорот нагласи дека реформите во правосудството се тековен процес што мора да се движи напред, при што ЕУ го следи развојот во секоја фаза од самото отворање на преговорите до приклучувањето на земјата, во делот на правосудните реформи и владеењето на правото.
