Германските власти ги предупредија своите граѓани да се воздржат од негативни коментари на сметка на Турција и на нејзината власт за време на посетата на оваа земја. Предупредувањето доаѓа по скандалот со сатиричната песна за турскиот претседател Реџеп Таип Ердоган.
Германското министерство за надворешни работи денеска издаде специјална препорака за германските туристи во Турција, на кои им се советува да избегнуваат непромислени изјави за турските претставници, вклучувајќи го и Ердоган.
Препораките се објавени на официјалната страница на министерството за надворешни работи.
Во соопштението се истакнува дека препораките не се поврзани со неодамнешниот инцидент со сатиричната песна на сметка на Ердоган.
Во препораките, исто така, се предупредуваат германските туристи да не купуваат и да не увезуваат антиквитети (камења, фосили или предмети кои изгледаат старо), затоа што можат да потпаднат под дефиницијата „културно и природно наследство“ и како такви се сметаат за државна сопственост.
Извозот на антиквитети се казнува парично или со 10 години затвор.
