Францускиот министер за одбрана, Жан-Ив ле Дријан, денеска изјави дека во нападите на француските борбени авиони на упориште на Исламска држава во сирискиот град Рака, мета биле странски борци кои планирале напади во Европа.
Ле Дријан, за радио „Европа-е“, рече дека бомбардиран е камп за обука и оти „целта е постигната“.
– Тоа беше втор француски напад во Сирија и нема да биде последен – рече Ле Дријан, не објаснувајќи ги наводните планови за напад.
Француското министерство ги критикуваше засилените воени акција на Русија во Сирија, наведувајќи дека 80 до 90 отсто од тие операции не биле против терористичката организација Исламска држава.
Франција се приклучи кон меѓународната коалиција, предводена од САД, за борба против ИД во Ирак и во Сирија.