Жител на скопски Раштак два часа го држел сопственото дете на нишан, заканувајќи им се на полицајците дека ќе стрела со пушката во него, а потоа и во нив, доколку влезат во неговата куќа за да извршат претрес.
По двочасовни преговори, Д.Ѓ. (43) му дозволил на еден од полицајците да влезе во куќата, по што бил совладан и приведен. Против него, како што информираа од полиција, поднесени се кривични пријави за недозволено држење оружје и распрснувачки материи и за спречување службено лице во вршење службено дејство, за што од судија во претходна постапка му е одредена мерка притвор во траење од 30 дена.
По влегувањето на полицаецот во куќата, во првиот момент кога Д.Ѓ. се оддалечил од сопругата и од детето, бил совладан, по што бил извршен претрес и биле пронајдени три пушки од различен калибар, автоматска пушка од непозната марка и калибар, револвер од непозната марка и калибар, пиштол, две воздушни пушки и разни видови муниција.
„Тој, во деведесеттите години, двапати бил кривично пријавен за извршени две тешки кражби, поседува дозвола за пиштол и за пушка, а во разговорот одби да даде појаснување од каде и како се набавени оружјето и муницијата во неговиот дом“, информираа од полиција.
Драмата во куќата на Д.Ѓ. се одвивала на 2 јануари, кога полицијата дознала дека тој во својот дом чува поголемо количество оружје и муниција. Кога полициските службеници пристигнале пред неговиот дом и затропале на влезната врата, на еден од прозорците се појавил тој со својата сопруга и со малолетното дете, кое го држел в раце. Ја вперил пушката кон полициските службеници и им се заканил дека ако се обидат да влезат, ќе стрела и во нив и во сопственото дете, по што со мебел ги забарикадирал двете влезни врати од куќата.
