Државниот завод за ревизија до Јавното обвинителство за 2022 година доставил 22 извештаи за 20 институции, од кои досега повратна информација имаат добиено само за пет конечни ревизорски извештаи. Ова денеска го изјави Максим Ацевски, главниот државен ревизор, посочувајќи дека не е задоволен од начинот на постапување на надлежните институции по конечните објавени ревизорски извештаи.
„Досега повратна информација имаме за пет конечни ревизорски извештаи, од кои за еден конечен извештај нема да се постапува, додека за четири конечни ревизорски извештаи преземени се мерки и се бара дополнително постапување од надлежните органи. Силно верувам дека таквото раздвижување и преземање на конкретни мерки по конечните ревизорски извештаи во иднина ќе продолжи со интензивно темпо, рече Ацевски на денешниот панел на „Отворениот форум за антикорупција“.
Со сличен став излезе и претседателката на Антикорупциската комисија Билјана Ивановска, која вели дека институциите не покажале декларативни заложби по нивните иницијативи.
„Судејќи според тоа како се постапува по нашите иницијативи и препораки и имајќи предвид дека ефектите се многу ниски, автоматски и мојата оценка е ниска и ми личи дека заложбата за борба против корупцијата е декларативна. Она што се случи со измените во Кривичниот законик мене не ми влева надеж дека борбата ќе се зајакне, туку напротив, ќе создаде нови жаришта на корупција“, рече Ивановска.
Ацевски нагласи дека ако се погледне Извештајот за извршената ревизија на Буџетот за 2022 година, ќе се види дека 16 институции кои користеле кредитни транши од меѓународни извори поради нивната несоодветно постапување, односно ненавремено повлекување на тие кредитни транши, државата има платено 26 милиони евра казнени пенали. За ова, епилог немало.
Тој потсети и дека конечниот ревизорски извештај за работењето на ЈЗУ Клиниката за онкологија и радиотерапија бил објавен во март, но добил значење дури во септември кога се направил дополнителен притисок од страна на медиумите за негово разгледување во Собранието.
„За првпат во историјата на работењето на Државниот завод за ревизија и на работењето на Собранието на нашата држава да се разгледува конечниот ревизорски извештај во Комисијата за финансирање и буџет кој има донесено повеќе заклучоци во кои учествуваше и ДЗР. Напоредно конечниот ревизорски извештај се користеше и како работен материјал во Анкетната комисија во која има одредени заклучоци. Видовме како заврши, рече Ацевски.
Тој потсети дека до Јавното обвинителство се доставени и конечни ревизорски извештаи за работењето на општините, каде што е констатирана негативност во работењето.
Двете институции, Државниот завод за ревизија и Антикорупциската комисија се едни од клучните кои ги даваат иницијалните сомнежи за корупција во институциите. На форумот беше потенцирано дека потребна е многу поголема соработка со надлежните со цел да се расчистат овие случаи на кои работеле двете институции.
Денеска на настанот беше презентиран и извештајот на Македонскиот центар за меѓународна соработка (МЦМС) за процена на корупцијата во Северна Македонија.
