Цената на дизел горивото се намалува за еден денар, а цената на бензините останува иста, соопшти денеска Регулаторната комисија за енергетика, водни услуги и услуги за управување со комунален отпад на Република Северна Македонија (РКЕ).
Литар дизел гориво од полноќ ќе чини 73 денари, бензинот еуросупер 95 – 76,5 денари за литар, а еуросупер БС 98 ќе чини 78,5 денари за литар. Маслото за горење екстра лесно 1 чини 72,5 денари, а килограм мазут, 40 денари.
„Референтните цени на нафтените деривати на светскиот пазар во споредба со претходната пресметка бележат намалување кај бензините во просек за 0,573%, кај дизелот 2,404%, кај екстра лесното масло 2,219% и кај мазутот зголемување во просек за околу 0,971%. Курсот на денарот во однос на доларот во изминатиот период по кој беа формирани цените со претходната пресметка е повисок за 0,131%“, соопштува РКЕ.
