Дизел горивото од ноќеска поевтинува за половина денар за литар, додека екстра лесното масло за домаќинство ќе поевтини за еден денар, информираа денеска од Регулаторната комисија за енергетика и водни услуги.
Од ноќеска на бензинските пумпи, Еуродизел БС ќе се продава за 77 денари за литар, додека екстра лесно масло ЕЛ-1 ќе чини 75,50 денари за литар. Малопродажните цени на бензините нема да се менуваат, така што Еуросупер БС – 95 ќе се продава за 80 денари за литар, а бензинот со 98 октани ќе чини 82 денари за литар. Мазутот М-1 од ноќеска ќе чини 42,773 денари за килограм.
„Референтните цени на нафтените деривати на светскиот пазар во споредба со претходната пресметка бележат зголемување во просек: кај бензините за 0,158 отсто, кај дизелот има намалување за 0,807 отсто, кај екстра лесното масло намалувањето е за 1,158 отсто и кај мазутот намалувањето е за 1,035 отсто“, информираат од РКЕВУ.
Курсот на денарот во однос на доларот во изминатиот период по кој беа формирани цените со претходната пресметка е понизок за 0,562 отсто.
