Државната изборна комисија (ДИК) на денешната седница ги запре сите натамошни активности поврзани со изборите кои беа закажани за 5 јуни.
Претседателот на ДИК, Александар Чичаковски рече дека треба да се запрат сите натамошни дејствија на општинските изборни комисии и тие да се задолжат да достават до ДИК извештај за работа и финансиски извештај за периодот од нивниот избор до 18 мај 2016 година.
– Предлагам да доставиме информација да се запрат сите натамошни дејствија и активности во насока на спроведување на предвремените парламентарни избори што требаше да се одржат на 5 јуни а кои актовности требаше да ги преземат Агенцијата за аудио и аудиовизуелни медиумски услуги, Државната комисија за спречување на корупција, Државниот завод за статистика и Државниот завод за ревизија – рече Чичаковски, пренесува „Телма“.
Членот на ДИК, Субхи Јакупи изјави дека Комисијата продолжува со секојдневната работа што е во нејзина надлежност.
– Бидејќи почнавме и стигнавме до прочистувањето на Избирачкиот список, јас мислам и понатаму да продолжиме со тие активности – рече Јакупи.
Собранието, вчера на седница, со измени на Изборниот законик, предложени од пратеникот на ДУИ, Талат Џафери, го избриша 5 јуни како датум за одржување на изборите. Нов датум не е предвиден со измените.
