Борците на Исламска држава вчера се судрија со ирачките безбедносни сили во најголемата рафинерија во земјата, во провинцијата Салахудин, и ги задржале неодамна освоените позиции на западот на земјата.
ИД минатиот месец претрпе значаен пораз кога ирачките трупи и шиитските паравоени единици го зазедоа Тикрит, но џихадистите пред неколку дена повторно нападнаа цели во западната провинција Анбар и на рафинеријата Баији, каде сега контролираат неколку постројки, вклучувајќи ја и онаа за дистрибуција и за складирање нафта.
Властите од провинцијата Салахудин соопштија дека на помош на силите во Баији им пристигнал баталјон војници и оти е запрено напредувањето на ИД.
Американскиот генерал Мартин Демпси соопшти дека „рафинеријата засега не е загрозена“. Ирачкиот премиер Хајдер ал-Абади рече дека по поразот во Тикрит, милитантите со нападот на Баији сакаат да испрати порака.