Во Собранието на Република Македонија денеска седници ќе одржат комисиите за економски прашања, за одбрана и безбедност и за прашања на изборите и на именувањата.
На дневен ред на Комисијата за економски прашања се предлог-законите за изменување и за дополнување на Законот за угостителска дејност, Законот за возила, Законот за државната статистика, Законот за трговски друштва, Законот за едношалтерскиот систем и за водење на трговскиот регистар и регистар на други правни лица, Законот за технолошки индустриски развојни зони, Законот за контрола на предметите од скапоцени метали и други закони, сите во право читање.
Членовите на Комисијата за одбрана и безбедност треба да ги разгледаат измените и дополнувањата на Законот за производство и за промет на вооружување и воена опрема, предлог-одлуката за изменување на Одлуката за испаќање припадник на Армијата на Република Македонија за учество во мировната операција на Европската унија „Алтеа“ во Босна и Херцеговина и предлог-законот за безбедност на сообраќајот на патиштата во второ читање.
Комисијата за прашања на изборите и на именувањата ќе ги утврди предлог-одлуката за дополнување на одлуката за избор на претседател, членови и заменици-членови на Советот на Собранискиот канал и предлог-одлуката за дополнување на одлуката на составот на Буџетскиот совет на Собранието на Република Македонија.