Индексот на трошоците на животот во јануари годинава, во однос на истиот месец минатата, 2022 година, бележи зголемување од 17,1 отсто, додека индексот на цените на мало, исто така, е зголемен и тоа за 13,3 отсто, информираше Државниот завод за статистика (ДЗС).
Од друга страна, пораст на цените во изминатиот месец во споредба со декември 2022 година, е забележан кај кафето, чајот и какаото и тоа за 1,9 отсто, рибата и морските плодови за 1,6 отсто, свежото и разладеното овошје за 1,2 отсто, жестоките пијалаци на 1,1 отсто, месото за 0,6 отсто. Лебот и житата поскапеле за 0,5 отсто, а шеќерот, џемот, медот, чоколадата и кондиторските производи за 0,2 отсто.
Податоците од Државниот завод за статистика покажуваат дека пораст на индексите на трошоците на животот е забележан и кај собирањето смет за 4,6 отсто, весниците, книгите и канцеларискиот материјал за 4,3 отсто, како и кај електричната енергија за 3,7 проценти.
Намалување на индексите на трошоците на животот, пак, во јануари годинава, во однос на декември 2022, е забележано кај свежиот и разладениот зеленчук, освен компирите и другите коренести плодови и тоа за 10,3 отсто, кај маслото и маснотиите за 3,2 отсто и кај виното за половина процент.
Намалување од 23, 4 отсто, според податоците на ДЗС, е забележан и кај воздухопловниот патнички транспорт. Намалување на индексите на трошоците за живот е забележано и кај снабдувањето со вода (4,4 отсто), медиумите за снимање (3 отсто), обувките (2,6 отсто), услугите за сместување (1,8 отсто), горивата и мазивата (1,1 процент).
