Бедредин Ибраими, член на Државната изборна комисија од ДПА, денеска на прес-конференција рече дека нема никаква причина претседателот Ѓорге Иванов да го помилува за дело за кое никој не го гони.
– Против мене СДСМ како партија поднесе кривична пријава за мојата одлука да гласам за поништување на гласањето на три избирачки места во општина Струмица на локалните избори. Бев повикан во Основното обвинителство, а пред два месеци и во Специјалното обвинителство и таму дадов исказ. И двете обвинителства досега не ме известиле ниту, пак, искажале интерес да ме гонат. Одлуката за мое помилување за дело кое не постои е беспредметна и бесмислена – рече Ибраими.