Што очекуваат младите од новата Влада? Новинарката на „Порталб.мк“ интервјуираше неколку млади луѓе, овозможувајќи им на сите да го кажат своето мислење за тоа што посакуваат новата Влада да смени во Република Северна Македонија (РСМ). Според одговорите, повеќето од младите очекуваат и сакаат многу промени во земјата, пренесува „Порталб.мк“.
Што очекувате од новата Влада и што би сакале истата да промени во РСМ?
Аурора Идризи, ученичка:
Многу работи треба да се променат во нашата земја. Да ги мотивира младите луѓе нудејќи им повеќе работни места и повисоки плати, за да не бидат принудени повеќе да ги напуштаат родните места и семејствата. Да се изградат повеќе места за забава на младите, како киносали, адреналински паркови (игралишта), базени, спортски паркови и други, со што ќе им се помогне на младите да развиваат здрави мисли, да ја зголемат нивната креативност и имаат можности за релаксација, затоа што освен кафулињата немаме друга опција. На младите им требаат такви работи, бидејќи токму тие се иднината на оваа земја, и имаме потреба за нешто убаво.
Сенад Мурати, студент:
Она што отсекогаш нè мачело и продолжува да нè мачи е, каде ќе се вработиме откако ќе ги завршиме студиите. Бидејќи во РСМ, младите со години имаат проблеми со вработувањето во насоката која ќе ја завршат. Ова придонесе многу млади луѓе да ги напуштат родните места и семејства, само за да најдат работа, поголеми плати за да имаат подобри услови за живот, а ова нашата земја не го нуди. Поради ова, не само јас, туку и целата младина очекуваме Владата да обезбеди што повеќе работни места за младите и високи плати. Потоа, Владата треба да инвестира во Попова Шапка, како природен ресурс што го имаме, а не можеме да си дозволиме да го користиме поради условите. Владата да донесе странски инвеститори и други промени што ѝ се потребни на нашата земја.
Илза Несими, студентка:
Со фер и правилно владеење во државата ќе има помалку недостатоци и помалку незадоволство кај народот, од друга страна, народот во Северна Македонија пати за подобар државен систем, а младите тонат во слоеви уништени од ограничувањата на слабиот владин систем. Како студентка на Универзитетот во Тетово, се надевам дека новата влада ќе ги просветли умовите на младите во земјата, така што ќе имаме иднина полна со професионалци од различни области. Со новата Влада треба да се овозможи вработување на лица подготвени и способни за работа, да се овозможи заштита на природата со закон и максимална грижа за животната средина, развој на образовниот систем и зголемување на можностите за студентите од различни области. На новата Влада ѝ посакувам конкретен пресврт во нашите животи.
Ајхан Беадини, студент:
Очекуваме новата влада да ја подобри економската состојба во земјата, за да има подобар живот и младите да не ја напуштаат земјата. Иако не мислам и не се надевам дека ќе има големи промени, сепак доволно е да се направат првите чекори за регулирање на економската и политичката состојба.
Адиса Зеќири, ученичка:
Сакам да преземе смели чекори за заштита на природата, да создаде средина каде што младите ќе го зајакнат својот претприемачки дух и креативност. Да понуди нова економија и нови технологии.
Бјанка Емини, студентка:
Иако претходната Влада успеа да потпише историски одлуки за државата, сепак, и оваа нова Влада мислам дека сè уште носи голема одговорност за реализација на некои од претходните ветувања. Покрај задачата за борба против корупцијата и невработеноста, би сакала посериозно да се сфати прашањето на загадувањето на животната средина, решавањето на етничките проблеми, емиграцијата, и да се направат напори да се спречат идните проблеми и тешкотии што може да ги донесат неочекуваните кризи како што е сегашниот случај на пандемија, овозможувајќи им на граѓаните постабилно и побезбедно место за живеење.
Она што генерално ги загрижува и им пречи на младите е очигледно недостатокот на работни места, како и ниските плати. Да се надеваме на овие и други промени, така што нашата младина ќе се врати од емиграција и никогаш да не замине повторно.
