Новиот претседател на Комисијата за спречување корупција, Горан Миленков, на правата средба со новинарите најави дека комисијата ќе работи транспарентно и дека редовно ќе ја известува јавноста за сите случувања и покренати постапки, но го игнорираше прашањето за тоа дали се сретнал со неговиот претходник и дали тој му кажал колку случаи му оставиле старите антикорупционери.
– На денешната конститутивна седница на Антикорупциската комисија, едногласно бев избран за претседател. Можам да ви кажам дека работата на овој состав ќе биде транспарентна, јавна, а новинарите ќе бидат известени за сите преземени дејства – рече Миленков.
Одговарајќи на новинарско прашање, новиот претседател на комисијата рече дека сè уште не разговарале за „бомбите“ што ги објавува опозицијата и не знае дали во разговорите има индиција за корупција.
