Поради високото ниво на загадување, во Кичево стапуваат на сила мерки и препораки со цел заштитување на здравјето на граѓаните, извести Министерството за животната средина и просторно планирање.
Мерките вклучуваат ослободување од работа за бремените жени и лицата постари од 60 години, како и скратувањето на работното време на половина за тие кои работат на отворено.
Во Кичево е надминат прагот на алармирање на суспендирани честички со големина до 10 микрометри, односно надмината е вредноста од 150 мг на кубен метар во текот на два последователни денови. Забележана е вредност од 155,44 на 23 јануари, а вредност од 150,99 на 24 јануари во западномакедонскиот град.
Покрај споменатите мерки се препорачува и да не се одржуваат спортски настани и други културни манифестации на отворено, да се обезбедат услови за зголемени активности на службите за итна медицинска помош, вработените во јавните институции да ја намалат употребата на службени возила до 50 отсто, како и да се обезбедат прифатилишта за бездомници.
