САД се наш стратешки партнер, чија што поддршка е од исклучително значење за напредокот на нашата држава, порача премиерот Димитар Ковачевски во својата честитка по повод Денот на независноста на САД – 4 Јули.
Во честитката премиерот Ковачевски истакна дека земјава имала стратешки партнер во САД во сите предизвици од нејзиното осамостојување до денес.
„Соединетите Американски Држави се наш стратешки партнер, чија поддршка во сите предизвици од независноста до денес, вклучувајќи ја и недвосмислената поддршка за процесот на евроинтеграции на Република Северна Македонија, исклучително ја цениме“, се вели во честитката.
Македонскиот премиер вели дека „заедничката посветеност на демократијата, на слободата, еднаквоста, почитувањето на човековите права, на градењето силни демократски општества“ е основата на која пријателството и партнерството на двете земји ќе продолжат да се развиваат и зајакнуваат, неизоставно и како сојузници во НАТО.
Во честитката се нагласува дека придонесот на САД „е огромен во делот на интензивирање на реформскиот процес за натамошна демократизација на нашето општество, владеење на правото, борба со корупција и криминал“.
