Дваесет и шестгодишно момче утринава било пронајдено мртво во подрумот од зградата во која живеело во Кочани, а на телото имало видливи траги од насилство, соопшти Јавното обвинителство.
„Веднаш по добивањето на информацијата, надлежен обвинител од Основното јавно обвинителство Кочани изврши увид заедно со увидна екипа од МВР. Со оглед на тоа што на телото беа најдени видливи траги на насилство, обвинителството за вршењето на увидот повика форензичка екипа од Министерството за внатрешни работи од Скопје“, стои во соопштението од Обвинителството.
Оттаму додаваат дека во насока на утврдување на причините за смртта на момчето, ОЈО Кочани издало наредба за обдукција на телото, како и наредби за прибирање на траги од местото и вршење на потребните вештачења.
