Повеќе од 100 лица загинаа во бомбашки напади во два сириски крајбрежни града, Џаблех и Тартус, соопштија набљудувачите од овие области кои се под контрола на владините сили и во кои се наоѓаат руските трупи.
Одговорноста за нападите во двата медитерански града, кои досега беа поштедени од ужасниот конфликт ја презеде Исламска држава.
Мета на нападите, како што соопшти ИД, беа приврзаниците на претседателот на Сирија, Башар ал Асад.
Изведени се најмалку пет самоубиствени напади и експлодирале два автомобили-бомби, соопшти Сириската опсерваторија за човекови права. Првите напади биле изведени во Тартус, каде владиниот сојузник Русија има поморска база, а потоа во Џаблех.
Државните медиуми ги потврдија нападите, но јавија за помал број на жртви. Министерството за внатрешни работи навело во своето соопштение дека има повеќе од 20 жртви, но подоцна државните медиуми соопштија дека се убиени 45 лица.
