Груевски на „Фејсбук“: Главата горе, доаѓаат подобри времиња


Скопје, 23 мај, 2018 - 16:16 (META) 

Поранешниот премиер и поранешен лидер на ВМРО-ДПМНЕ, Никола Груевски по денешната пресуда од две години казна затвор која му ја изрече Кривичниот суд за случајот „Тенк“ на „Фејсбук“ напиша „доаѓаат подобри времиња“.

„Главата горе горди мои Македонци и горди граѓани на Македонија. Ова е твоја земја, ние нема да те изневериме и ќе бидеме рамо до рамо со тебе, во сите предизвици. Ти си нашата сила, ние сме вашата сила. Доаѓаат подобри времиња. Главата горе и не заборавајте, ова е ваша земја, ова е земја на сите вие кои што живеете во неа и ничија друга. Вие одлучувате! Да живее Република Македонија“, напиша Груевски.

Ова е дел од говорот кој Груевски го држеше на митингот во Скопје пред предвремените парламентарни избори во декември 2018 година, а видео од тој митинг денеска Груевски сподели на социјалните мрежи.


„Твитер“ за затворската казна на Груевски: Она на М! Марица?


Скопје, 23 мај, 2018 - 15:12 (META) 

Откако во Кривичниот суд беше прочитана пресудата за поранешниот премиер Никола Груевски во случајот „Тенк“ на СЈО и тој беше осуден на две години казна затвор, на социјалните мрежи се масовно коментира настанот.


Груевски доби две години казна затвор за луксузниот „мерцедес“


Скопје, 23 мај, 2018 - 13:26 (META) 

Кривичниот суд го осуди на две години казна затвор поранешниот премиер и поранешен претседател на ВМРО-ДПМНЕ, Никола Груевски во судскиот процес „Тенк“, за набавката на луксузниот блиндиран „мерцедес“ од 35 милиони и 266 илјади денари, односно 575.000 евра.

Груевски, кој не се појави во судница да ја слушне пресудата, беше обвинет за „примање награда за противзаконито влијание“.

Ова е првата пресуда против Никола Груевски во случаите што против него ги води Специјалното јавно обвинителство (СЈО).

Поранешниот помошник-министер за јавни набавки во МВР, Ѓоко Поповски, кој беше обвинет за злоупотреба на службената положба и овластување доби казна од шест години и шест месеци.

Покрај тоа, обајцата треба да ги надоместат и судските трошоци во износ од 325.584 денари.

Во овој случај обвинета за истото дело е обвинета и поранешната министерка за внатрешни работи Гордана Јанкулоска, но постапката за неа беше издвоена поради „ризична бременост“.

– Неспорно е дека е набавено возило марка „мерцедес“ и дека обвинетите знаеле дека се работи за исклучително скапо возило. Груевски побарал, а Јанкулоска извршила службено дејствие кое не смеела да го изврши и го поттикнала Поповски да го стори кривичното дело злоупотреба на службената положба. Обвинетите го фаворизирале економскиот оператор „Мак Аутостар“ – рече пред изрекување на пресудата судијката Добрила Кацарска.

Како што образложи Кацарска, од изведените докази меѓу кои се прислушувани разговори до сега не објавени, судот утврдил дека уште во февруари 2012 година, два месеци пред да биде распишан јавниот оглас, Груевски во телефонски разговор со Гордана Јанкулоска кажува дека ги видел сите три проспекти и дека него го интересира само „она на М“, а потоа на 30 март истата година, еден месец пред да биде распишан огласот, одговорниот во импортерот „Мак Аутостар“ извршил резервација на возилото, во централата во Штутгарт, а потоа во друг меил десетина дена подоцна ги информирал дека работата сигурно ќе биде средена за возилото да се испорача.

Како што рече Кацарска, од доказите се утврдило дека обвинетиот Ѓоко Поповски бил во комуникација со „Мак Аутостар“ и од нив побарал точна спецификација на „мерцедесот“ за токму таа спецификација да биде ставена во јавниот оглас, со што несомнено се гледа дека огласот бил наместен за да се набави автомобилот што го сакал Груевски.

Во образложението на пресудата беше кажано дека од другите докази се видело дека во постојана координација на Јанкулоска, Поповски и вработените во МВР што требале да го напишат огласот се правело сè за да се исклучи можноста да се јави друг конкурент, односно како што рече, слични возила нуделе и „бмв“ и „ауди“, но огласот бил напишан за специфични менувач, заден погон и сила на моторот како и за друга техничка опрема, што другите производители не можеле да ги понудат.

За набавката од март до јули интензивно комуницирале и Јанкулоска и тогашниот генерален серетар на владата Кирил Божиновски при што и тој бил прецизно информиран дека работата е средена за да се добие „мерцедесот“ што го барал Груевски.

„Бомбата“ за набавката на луксузниот блиндиран „мерцедес“ беше објавена пред малку повеќе од три години, на 13 мај 2015 година. Во јануари 2017 година почна истрагата на СЈО, а во јануари 2018 година започна и судскиот процес. Обвинителите од СЈО побараа осудителна пресуда, бидејќи набавката била лична желба и хир на експремиерот купена со буџетски пари, при што била фаворизирана една фирма.


Десетина лица на протест пред Кривичен суд ја чекаат пресудата за Груевски во „Тенк“


Скопје, 23 мај, 2018 - 12:41 (META) 

Околу триесетина лица се собрани на протест пред Кривичниот суд во Скопје исчекувајќи ја судската пресуда за поранешниот премиер и екс лидер на ВМРО-ДПМНЕ, Никола Груевски, во случајот „Тенк“ на Специјалното јавно обвинителство.

Помеѓу присутните се и поранешниот градоначалник на Скопје, Коце Трајановски и поранешниот градоначалник на општина Аеродром, Ивица Коневски.

Полицијата уште синоќа го огради судот со метална ограда и го ограничи движењето.

Во случајот „Тенк“ кој се однесува на набавката на луксузниот мерцедес, Груевски е обвинет за примање награда за противзаконито влијание. Обвинителите од СЈО побараа осудителна пресуда, бидејќи набавката била лична желба и хир на експремиерот купена со буџетски пари, при што била фаворизирана една фирма.


Груевски и Поповски денеска ќе ја чујат пресудата за луксузниот „мерцедес“


Скопје, 23 мај, 2018 - 9:20 (META) 

Во Кривичниот суд во Скопје денеска ќе биде објавена пресудата за случајот „Тенк“, во кој осомничени за набавката на скапиот луксузен „мерцедес“ вреден речиси 600.000 евра се екс-премиерот Никола Груевски и поранешниот помошник-министер во МВР, Ѓоко Поповски.  Во овој случај обвинета е и поранешната министерката за внатрешни работи Гордана Јанкулоска, но постапката за неа беше издвоена поради „ризична бременост“.

Поповски вчера беше осуден на деветгодишната затворска казна за случајот „Триста“, за  незаконска набавка на 300 полициски возила за МВР во периодот од 2008 до 2012 година, а му беше одреден и притвор поради опасност од бегство.

Пред Основен суд Скопје 1 се поставени метални барикади, во очекување на протест поради пресудата.


Завршни зборови во судењето за луксузниот „мерцедес“, рочишта и за „Трезор“ и за „Шпион“


Скопје, 17 мај, 2018 - 10:30 (META) 

Во Основен суд Скопје 1, денеска повторно судиите и обвинителите се со пополнет распоред, бидејќи ќе се одржат три рочишта од најзначајните судски процеси.

Во случајот „Тенк“, во кој, за набавката на блиндираниот „мерцедес“ вреден близу 600.000 евра, им се суди на поранешниот премиер Никола Груевски и поранешниот помошник министер во МВР Ѓоко Поповски, треба да бидат изнесени завршните зборови на одбраната. Во овој случај обвинета е и поранешната министерката за внатрешни работи Гордана Јанкулоска, но постапката за неа беше издвоена поради „ризична бременост“.

Во Кривичниот суд за денеска се закажани рочишта и за предметите на Специјалното јавно обвинителство „Шпион“ и „Трезор“.

Во случајот „Шпион“ кој е од 2013 година, осудени се 18 лица за злосторничко здружување, шпионажа, уцена, измама и недозволено поседување оружје. Апелацискиот суд лани ги ублажи казните на обвинетите и ја преиначи првостепената одлука на Кривичниот суд. Предметот „Шпион“ сега го застапува Специјалното јавно обвинителство, откако го презеде од редовното обвинителство.

На претходното рочиште судот одлучи на Зоран Божиновски да му се суди заедно со обвинетите во случајот „Шпион“, чија постапка беше раздвоена поради тоа што им беше недостапен на органите на прогон, а во април 2016 година беше уапсен во Нови Сад и беше екстрадиран во Македонија.

Во „Трезор“ првообвинет е поранешниот директор на УБК Сашо Мијалков, поранешниот шеф на неговиот кабинет Тони Јакимовски, поранешниот помошник-министер во МВР, Небојша Стајковиќ и поранашениот началник на Петтата управа во МВР Горан Грујевски, кој веќе со месеци се наоѓа во екстрадициски притвор во Грција.

Тие се товарат за злоупотреба на службената положба и овластувања и предизвикување штета на Буџетот во висина од 862.045 евра за набавката на електронско-комуникациска опрема за потребите на Петтата управа при УБК и обука за нејзино користење од фирма од Велика Британија.


СЈО со нови докази за блиндираниот „мерцедес“


Скопје, 14 мај, 2018 - 13:55 (META) 

Специјалното јавно обвинителство (СЈО) денеска поднесе нови докази за случајот „Тенк“. Одбраната се спротивстави на разгледување на  доставените нови докази. По дебатата во судницата и инсистирањето на СЈО дека станува збор за битни докази кои треба да бидат прифатени од судот, беше дадена пауза за да се произнесе судечкиот совет, а по неа приговорот на одбраната беше отфрлен.

СЈО како нов доказ ја предложи електронската комуникација меѓу „Мак Аутостар“ од каде е набавен спорниот „мерцедес“ и компанијата „Дајмлер“ од Германија.

– Од меил комуникацијата произлегуваат многу битни елементи и од нив може да се разјаснат прашањата кои беа спорни за одбраната. Не се работи за вообичаена, туку за прецизна и специфична комуникација за набавката што е предмет на обвинение – истакна обвинителот Стевчо Донев.

Со ова, комуникацијата меѓу „Мак Аутостар“ и „Дајмлер“ ќе биде еден од доказите со кои СЈО ќе го докажува обвинението со кое се спори набавката на „мерцедесот“ од 600 000 евра.

Судскиот совет, инаку, го прифати барањето на обвинетиот Никола Груевски да побара информација од „Ауто Македонија“ АД Скопје дали може секој да увезе возило од секаква марка. Груевски преку своите адвокати побара и Судот да обезбеди известување од Општина Новаци во врска со јавна набавка на патничко моторно возило, но судијката Кацарска нагласи дека во овој предмет тоа е сосема ирелевантно, бидејќи набавката на возило од страна на Општина Новаци не е поврзана со предметот на обвинението.

Меѓу поднесоците на одбраната, имаше барање Судот да обезбеди информации за тоа колку пати од јули 2006 до февруари 2016 имало потреба од сервисирање на возилото што се користело пред луксузниот мерцедес, но и ова барање не беше прифатено.


Завршни зборови за „Тенк“, продолжуваат судењата за „Тендери“ и „Тотал“


Скопје, 14 мај, 2018 - 10:18 (META) 

Во Основниот суд Скопје 1 денеска ќе се одржат три судски рочишта за случаите на Специјалното јавно обвинителство, од кои за еден ќе се изнесуваат завршните зборови.

Во судењето за случајот „Тенк“, во кој, за набавката на прескапиот блиндиран „мерцедес“ вреден близу 600.000 евра, на поранешниот премиер Никола Груевски и поранешниот помошник министер во МВР Ѓоко Поповски, треба да бидат изнесени завршните зборови на одбраната. Во овој случај обвинета е и поранешната министерката за внатрешни работи Гордана Јанкулоска, но постапката за неа беше издвоена поради „ризична бременост“.

Во Кривичниот суд покрај овој процес, денеска ќе има рочишта и за  случаите „Тендери“ и „Тотал“. Во првиот случај и се суди на поранешната министерка за култура Елизабета Канческа – Милевска, за тендерот за завршни работи во Музејот на македонската борба за државност и самостојност од проектот „Скопје 2014“. Во овој случај обвинети се уште двајца членови на Комисијата за јавни набавки.

Во случајот „Тотал“, му се суди на новинарот Драган Павловиќ-Латас, кој не присуствуваше на претходните три рочишта поради здравствени, односно семејни причини. Латас се товари дека давал лажни податоци во завршните сметки и даночните пријави при што преку неговите фирми затаил данок во износ од 7.466.981 денар или 121.414 евра, а лично тој затаил 3.876.471 денар или 63.032 евра.


Урко се појави во судот да сведочи во случајот „Тенк“


Скопје, 25 април, 2018 - 11:05 (META) 

Поранешниот шеф на обезбедувањето на Никола Груевски, Дејан Митровски Урко, утрово пристигна во новиот Кривичен суд во Скопје каде треба да сведочи за набавката на „мерцедесот“.

Тој требаше да се појави и на претходното рочиште. Тогаш судијката им посочи на адвокатите на Груевски да го побараат телефонски да дојде, но тие не успеаа да стапат во контакт со него. Судијката рече ако не дојде и денеска ќе го избрише од листата сведоци.

Покрај Урко на денешното рочиште се појави и Зоран Василевски кој не дојде на претходното рочиште бидејќи бил на службен пат.

Денеска треба да сведочат и вештаци и да се чита нивниот извештај. Потоа следува и изведувањето на писмените докази на одбраната.

На претходните две рочишта во судот беа сослушани вкупно 19 лица предложени од Груевски и неговите адвокати. Сите биле дел од тимот за обезбедување во времето кога тој беше премиер и сите ја потенцираа лошата состојба на стариот блиндиран мерцедес и потребата од набавката на ново возило.

Покрај Груевски, обвинет е и поранешниот помошник-министер во МВР, Ѓоко Поповски. На обвинителна клупа со нив седеше и екс министерката Гордана Јанкулоска, но поради ризична бременост постапката за неа беше раздвоена.


Дејан Митревски-Урко не се појави во суд, судијката побара да го повикаат по телефон


Скопје, 23 април, 2018 - 11:18 (META) 

Дејан Митревски -Урко денеска не се појави во Кривичниот суд каде што требаше да сведочи за случајот на СЈО „Тенк“, во кој обвинет е Никола Груевски за набавка на „мерцедесот“ од речиси  600.000 евра.

Одбраната на Груевски не беше информирана зошто Урко не се појави во судница, поради што судијката Добрила Кацарска им наложи да му се јават по телефон и да го повикаат.

Во „Тенк“ обвинети се поранешниот премиер Никола Груевски, поранешната министерка за внатрешни работи Гордана Јанкулоска и поранешниот помошник министер во МВР, Ѓоко Поповски. Пред две рочишта Судот донесе одлука да ја раздвои постапката за Јанкулоска поради ризична бременост.

За набавката на мерцедесот треба да сведочат осум сведоци, кои биле задолжени за безбедноста на Груевски додека беше премиер.