Продолжува судењето за насилствата и упадот во Собранието на 27 април


Скопје, 24 август, 2018 - 9:53 (META) 

Судењето на 33. обвинети за насилствата при упадот во Собранието на 27 април 2017 година денеска е во третото продолжение, а исто како и на вчерашното рочиште, во Основен суд Скопје 1, денеска ќе продолжи давањето воведни говори од адвокатите на обвинетите.
Судскиот процес започна во средата кога воведен говор даде обвинителката Вилма Рускоска.

Обвинителката Русковска во воведниот говор истакна дека има докази со кои ќе ги потврди наводите од обвинението за сторено кривично дело терористичко загрозување на уставниот поредок, а одбраната тврди дека не постојат докази кои укажуваат на тоа. Според дел од адвокатите, обвинетите сториле тероризам, но само со зборови, а не и со дела.

Вкупно обвинети се 33 лица од кои 31 за терористичко загрозување на уставниот поредок, а две за помагање.  На обвинителната клупа се Љубен Арнаудов, Сашо Василевски, Крсто Мукоски, Љупчо Димовски, Јохан Тарчуловски, Митко Чавков, Митко Пешовски, Душко Лазаров, Горан Јошевски-Леви, Оливер Поповски, Оливер Радулов, Сашко Марковски, Мунир Пепиќ, Абдуљфета Алими, Елена Доцевска-Божиновска, Иван Цветановски, Борис Дамовски, Богдан Илиевски, алијас „Бетмен велит“, Владо Јовановски, Игор Дурловски, Стефан Младеновски, Михаил Младеновски, Захарие Симовски, Младен Додевски, Јане Ченто, Горанче Ангеловски, Игор Југ, Илија Славески, Влатко Трајков, Вилијам Михајловски, Никола Митревски-Кољо, Александар Василевски-Нинџа и Митре Питроповски.

Судијката Кацарска закажа вкупно 37 термини за главна расправа.


Рускоска: Нарачателите за 27 април ќе бидат обвинети кога ќе има цврсти докази


Скопје, 23 август, 2018 - 11:27 (META) 

Во Кривичниот суд во Скопје денеска ќе продолжи судскиот процес за настаните во Собранието од 27 април минатата година. Вчера, на првото рочиште, воведни говори имаа обвинителката Вилма Рускоска и адвокатите на дел од обвинетите.

Во случајот обвинети се триесет и три лица, од кои триесет и едно од обвинетите одговараат за „тероризам“, додека две за „помагање“.

-Триесет и шест сведоци и многу материјални докази, телевизиски снимки, како и снимки од камери од институции, ќе ја докажуваат вината на обвинетите од настаните од 27 април во Собранието на Република Македонија – изјави вчера обвинителката Рускоска по првото рочиште.

Таа рече дека засега само за овие обвинети имаат цврсти докази, но не исклучи и нови обвиненија доколку се обезбедат други докази.

– Кога ќе имаме цврсти докази за организаторите или нарачателите, тогаш и тие ќе бидат обвинети – рече Рускоска.

Прашана дали има потреба од обезбедување за неа, обвинителката рече дека до сега немала потреба од такво нешто и оти нема намера да побара бидејќи нема никакви закани кон нејзе.

Во воведните зборови попладнево Рускоска истакна дека нападите во Собранието ќе останат длабоко врежани во историјата на Македонија. Според неа, напаѓачите, кои се обвинети, биле предводени од Александар Василевски-Нинџа и Никола Митровски-Кољо.

Таа смета дека одговорните во полицијата во тој период се поставиле на страна на напаѓачите, а биле помогнати од пратениците кои ги отвориле вратите во Собранието и водачите на „За заедничка Македонија“, кои имале задача со потпалувачки говори да ја повикаат масата кон Собранието.

Предметот го води судијката од организиран криминал Добрила Кацарска, која веќе закажа вкупно 37 термини за главна расправа.


Заштитениот сведок препозна неколкумина од обвинетите во „Монструм“


Скопје, 22 август, 2018 - 12:41 (META) 

Заштитениот сведок кој беше сослушан преку камера од друга просторија на денешното рочиште за случајот „Монструм“ на СЈО со модифициран глас кажа дека си останува на исказот даден на претходна постапка и препозна тројца од обвинетите.

Сведокот рече дека од 30 сантиметри до 30 метри далечина, во неколку наврати, секој ден пред да се случат убистватат ги гледал на местото Фејзи Аџири, Агим Исмаиловиќ и Сами Љута, кои денес директно ги опиша и ги посочи во судницата. Лицето со брада што го гледал исто така, не е овде, рече сведокот.

На прашање од обвинителката од СЈО, Фатиме Фетаи, тој рече дека за настанот дознал од медиумите и сам од морални причини се пријавил во полиција за да каже што знае.

Сведокот кажа дека три-четири дена пред настанот видел четири лица со црн „Голф 3“ со затемнети стакла на местото на настанот. Посочи дека имало црн висок човек, едниот имал лузна на левата страна, друг бил ќелав, еден на 50-тина години, а друг на 35-6 години.

Прашан како се однесувале, рече „нормално како сите луѓе“. Последен пат ги видел на 12 април. Обвинителката Фетаи му посочи дека има разлики во исказите во однос на времињата дадени претходно и сега, на што сведокот одговори дека поминало многу време и оти не се сеќава.

Заштитениот сведок рече дека вршел препознавање во обвинителство, каде му биле покажани фотографии, без притисоци и закани.

Фетаи побара од сведокот да каже дали препознава некој од тие што ги видел на местото на настанот сега да се присутни во судницата. Препозна неколкумина и ги опиша, по што обвинителката Фетаи ги посочи Агим Исмаиловиќ и Самир Љута.

Фетаи побара Самир Љута да стане, на што сведокот кажа дека е 100 отсто сигурен дека е тоа лицето со лузна. Прашан од која далечина ги видел овие лица, кажа дека секогаш различно и дека ги имал видено од пет метри до еден метар близина.

Сведокот тврди дека ги видел на местото и на 12 април 2012, еден час пред убиството, истите овие луѓе што ги гледал секој ден, претходните 3-4 дена.


Обвинителката Фетаи бара екстрадиција на Африм Исмаиловиќ и Алил Демири


Скопје, 22 август, 2018 - 12:02 (META) 

Обвинителката од СЈО, Фатиме Фетаи, на почетокот на рочиштето за случајот „Монструм“ побара од судот да започне постапката за екстрадиција на обвинетите Африм Исмаиловиќ и Алил Демири, кои се на Косово и се недостапни за македонските власти, а по нив е распишана меѓународна потерница.

Судијата Огнен Ставрев кажа дека веќе се во контакт со косовските власти за постапката за екстрадиција.

Во однос на барањето за исклучување на јавноста од сослушувањето на заштитениот сведок, Фетаи рече дека не гледа ниту една причина тоа да биде направено. Според Законот за заштита на сведоци, а и во интерес на сите нас е јавноста да биде присутна на сослушувањето, рече Фетаи.

Судијата Ставрев кажа дека јавноста нема да биде исклучена и ќе може да присуствува на сослушувањата на заштитениот сведок во „Монструм“.

На последното рочиште за „Монструм“ на 11 јули се гледаа аудио и видео снимка од испрашувањето на заштитениот сведок Хаки Азири од 7 мај 2012 година од страна на истражен судија и обвинител во Кривичниот суд. Пред Судот исказ даваше и сведокот Сашо Лазаревски, сосед на едно од убиените момчиња.

За петкратното убиство кај Смилковско езеро на 12 април 2012 година, кога беа убиени момчињата Кире Тричковски, Филип Славковски, Цветанчо Ацковски, Александар Наќевски и рибарот Борче Стефановски, беше отворен предмет „Монструм“, а на доживотен затвор беа осудени Алил Демири, Африм и Агим Исмаиловиќ, Езим и Хаки Азири и Сами Љута.

Врховниот суд во декември лани ги укина пресудите, ги ослободи од притвор осудените Агим Исмаиловиќ, Хаќи Азири, Сами Љута и Фејзи Азири, и им определи мерки на претпазливост. По укинувањето на пресудите, случајот „Монструм“ го презеде СЈО и предметот беше вратен на повторно судење.


Продолжува судењето за „Монструм“


Скопје, 22 август, 2018 - 10:49 (META) 

Во Кривичниот суд денеска продолжува судењето за предметот „Монструм“ на Специјалното јавно обвинителство, за петкратното убиство кај Смилковско езеро, сторено на 12 април 2012 година. Претходното рочиште беше одложено поради болест на судијата Осман Шабани.

На последното рочиште за „Монструм“ се гледаа аудио и видео снимка од испрашувањето на заштитениот сведок Хаки Азири од 7 мај 2012 година од страна на истражен судија и обвинител во Кривичниот суд. Пред Судот исказ даваше и сведокот Сашо Лазаревски, сосед на едно од убиените момчиња.

За петкратното убиство кај Смилковско езеро на 12 април 2012 година, кога беа убиени момчињата Кире Тричковски, Филип Славковски, Цветанчо Ацковски, Александар Наќевски и рибарот Борче Стефановски, беше отворен предмет „Монструм“, а на доживотен затвор беа осудени Алил Демири, Африм и Агим Исмаиловиќ и Езим и Хаки Азири и Сами Љута.

Врховниот суд во декември лани ги укина пресудите, ги ослободи од притвор осудените Агим Исмаиловиќ, Хаќи Азири, Сами Љута и Фејзи Азири, и им определи мерки на претпазливост. По укинувањето на пресудите, случајот „Монструм“ го презема СЈО и предметот беше вратен на повторно судење.

За судот се уште недостапни се Алил Демири и Африм Исмаиловиќ по кои се распишани меѓународни потерници.


Почнува судењето за крвавиот четврток, 28 лица се гонат за тероризам


Скопје, 22 август, 2018 - 9:36 (META) 

Поранешниот министер за внатрешни работи и директор на Бирото за јавна безбедност, Митко Чавков, четворица пратеници, оперскиот пејач Игор Дурловски, твитерџијата Богдан Илиевски, режисерот Борис Дамовски, актерот Владо Јовановски, Александар Василевски-Нинџа, денеска ќе седнат на обвинителна клупа, заедно со уште дваесетина други обвинети за крвавото насилство во Собранието на 27 април 2017 година, кога беа нападнати и тешко повредени пратеници, новинари и членови на обезбедувањето.

Процесот ќе го води судијката Добрила Кацарска, која досега закажа 37 последователни термини за главната расправа.

Обвинител ќе биде Вилма Русковска, од Основното јавно обвинителство за гонење организиран криминал и корупција.

Најголемиот дел од 32-та обвинети се товарат за  терористичко загрозување на уставниот поредок и безбедноста, а две лица за помагање. Во бегство единствено е Дејан Давидовски – Дешо.

Од обвинетите, 11 се во притвор, 13 се во куќен притвор, а осуммина имаат мерки за претпазливост и гаранции.


Утре почнува судењето за насилството во Собранието на 27 април


Скопје, 21 август, 2018 - 12:24 (META) 

Во Кривичниот суд во Скопје утре во 10 часот почнува нова постапка за упадот и насилствата во Собранието на 27 април минатата година. Предметот ќе го води судијката од организиран криминал Добрила Кацарска.

Јавното обвинителство на Република Македонија, во март годинава објави дека е поднесен обвинителен акт против 30 лица, од кои 28 за терористичко загрозување на уставниот поредок и безбедноста од чл. 313 од Кривичниот законик, а две лица за помагање при вршење на истото кривично дело. Според ЈОРМ, со обвинителниот акт се опфатени три лица, припадници на структурите на Министерството за внатрешни работи, кои како овластени службени лица биле носители на „златна“ и „сребрена“ команда, како и лица кои биле учесници во друга група, како организатори на движењето „За заедничка Македонија“.

Основниот суд Скопје 1 информираше дека за следниот период се закажани вкупно 37 термини за главна расправа, за што веќе се изготвуваат наредби за спровод за обвинетите кои се наоѓаат во куќен притвор, како и покани за останатите странки во предметот.

Судијката Славица Андреевска на 5 јули годинава ги изрече пресудите за седуммината обвинети за обид за убиство на пратеникот Зијадин Села во Собранието на 27 април минатата година. Кире Ѓорѓиевски доби затворска казна од 13 години, Андреј Мицов 10 години и шест месеци, Оливер Ошавковски 10 години и шест месеци, Николче Димитриевски 10 години и шест месеци, Александар Јаневски – Тошта 13 години, Никола Војминовски 13 години и шест месеци и Коста Делев 10 години и шест месеци.


Протоѓер во „Титаник“: Ноќта на петти на „А1“ ќе им се мочам у уста


Скопје, 20 август, 2018 - 16:39 (META) 

По паузата во Кривичниот суд продолжи објавувањето на прислушуваните разговори во предметот „Титаник“. До сега објавени се 219 од вкупно 1.063 „бомби“.

Во разговор од 31 мај 2011 година меѓу ексминистерката за внатрешни работи Гордана Јанкулоска и шефот на кабинетот на експремиерот Никола Груевски, Мартин Протоѓер, таа му раскажува дека тогашниот пратеник од ВМРО-ДПМНЕ, Петар Поп Арсов не бил популарен кај јавноста и да му дадат друга обврска, за да не оди со неа меѓу граѓаните.

– Тој е добронамерен, ама не е популарен – вели Јанкулоска.

На пет дена пред изборите Протоѓер ја прашува Јанкулоска дали ќе ги победат СДСМ: „Ќе ги згазиме ли?“, прашува тој, на што ексминистерката се смее. Протоѓер потоа на повисок тон ѝ вели на Јанкулоска: „Ноќта на петти на ‘А1’ ќе им се мочам у уста“, алудирајќи на аферата со списоците.

Во Кривичниот суд се слуша во „бомбите“ како Јанакиески договара со транспортни фирми на нивни трошок да разнесуваат гласачи, иселеници, во избирачките места во дијаспората.

Судијата Осман Шабани закажа 2 нови рочишта за предметот „Титаник“ на 12 и 24 септември. Осомничените во случајот „Титаник“ на СЈО се товарат за злосторничко здружување, повреда на избирачкото право, повреда на слободата на определување на избирачите, поткуп при избори и гласање, уништување изборен материјал и злоупотреба на средства за финансирање изборна кампања.


Претседателот на ДИК, Деркоски, во 2011 добивал наредби од Јанакиески за гласањето


Скопје, 20 август, 2018 - 11:50 (META) 

Оливер Дерковски, сегашниот претседател на ДИК, во „бомбите“ кои се пуштаат денеска во судница за време на рочиштето за „Титаник“ на СЈО, два дена пред изборите во 2011 година добива инструкции од обвинетиот Миле Јанакиески да се залепат плакати за сателитската партија СДПМ, за да се збунат гласачи на СДСМ.

Станува збор за партијата која на секои избори излегува со листи за пратеници со имиња слични на оние од СДСМ, со цел да ги збуни гласачите. Така, носители на избори листи на минатите избори беа имиња како Рада Шекеровска, Зоран Зашев, Игор Ивановски и Јанис Макрис.

Во еден од разговорите од 30 мај 2011 година, Јанакиески, на Дерковски, кој тогаш бил директор на МЖ Транспорт, му вели дека ќе добијат материјали и насоки за денот на гласањето:

– Нашите да пијат кафе до 7 во штабовите. До 9 да гласаат. До 10 да гласаат пријатели и роднини, до 12 сите вработени, а после неопределените – вели Јанакиески, а тој му вели „добро, во ред“.

Претходно Миле Јанакиески и Горан Трајковски, тогашниот директор на УЈП, договараат да затворат 4 дуќани кај „Циганите“, како што ги нарекуваат, во Струмица.

– Има сет дуќани, четири дуќани во ромско маало во Струмица се полни до врв со брашно. Со нив Заев ќе купува гласови. Затворете ги дуќаните, тамам пазарот заврши. Речете им канцерогено е – му вели Јанакиески на соговорник Ѓоко од Инспекторатот за храна и ветеринарство.


Во Кривичен суд продолжува слушањето бомби за „Титаник“


Скопје, 20 август, 2018 - 9:38 (META) 

Во Основен суд Скопје 1, односно Кривичниот суд денеска продолжува слушањето на „бомбите” во предметот „Титаник” на Специјалното јавно обвинителство (СЈО).

Преслушувањето почна во четвртокот, а продолжи во петокот со 106 од вкупно 1.063 „бомби“.

Досега на снимките се слушнаа разговори меѓу поранешната министерка за внатрешни работи Гордана Јанкуловска, поранешниот министер за транспорт Миле Јанакиески, поранешниот министер за финансии Зоран Ставрески, шефот на Кабинетот на поранешниот премиер Мартин Протуѓер и други лица околу изборната кампања за изборите во 2013 година.

Одбраната реагираше дека снимките немаат никаква доказна вредност, на што судијата Осман Шабани рече дека доказите се прифатени и ќе бидат изведени, а потоа судот ќе цени дали тие се однесуваат на кривичното дело или не.

За „Титаник“, СЈО има поднесено 5.910 материјални докази и предложено 191 сведок.

Обвинети се поранешниот премиер Никола Груевски и поранешните функционери Мартин Протуѓер, Кирил Божиновски, Миле Јанакиески, Гордана Јанкулоска, Билјана Бришкоска – Бошковски, како и Илија Димовски, Мунир Пепиќ, Едмонд Темелко, Леко Ристовски, Кирил Тодоровски, Катерина Веловска, Станко Коруновски, Коста Марковски, Драгче Драгчески, Марјан Накевски, Гоце Јаневски, Џезми Ахмет, Роберт Давитков, Далибор Алешковиќ и Ленка Рашајковска.