Закерберг се извини во Европскиот парламент за злоупотребата на податоците од „Фејсбук“


Брисел, 23 мај, 2018 - 11:36 (META) 

Основачот на „Фејсбук“, Марк Закерберг се извини пред пратениците во Европскиот парламент, порачувајќи дека компанијата не направила доволно за да ги спречи злоупотребите од оваа социјална мрежа и дека регулацијата е важна и неминовна.

„Не ја разгледавме во потполност нашата одговорност. Тоа беше грешка и жалам поради тоа“, изјави Закерберг.

Тој одбил да одговори на прашањето дали имало размена на податоци помеѓу „Фејсбук“ и неговите подружници како „Уац ап“ и дали ќе преземе чекори за да им овозможи на корисниците да ги блокираат таргетираните рекллами.

Сведочењето на Закерберг следува откако е откриено дела личните податоци на повеќе од 87 милиони корисници се злоупотребени од страна на консултантската куќа „Кембриџ аналитика“ за политички цели.

Закерберг за овие злоупотреби сведочеше и во американскиот Конгрес, но одби да сведочи во британскиот парламент каде што ја испрати неговата соработничка.


Владата отвора канал за онлајн-комуникација со граѓаните, нема да дава пари за реклами


Скопје, 2 февруари, 2018 - 10:33 (META) 

Владата ќе комуницира со граѓаните преку социјалните мрежи и преку јавниот радиодифузен сервис МРТ, а нема намера за тоа да троши буџетски пари, одговори владиниот портпарол Миле Бошњаковски на прашањето од „Мета“ дали Владата ќе плаќа реклами кога ќе комуницира со јавноста преку јавниот радиодифузен сервис МРТВ и дали планира да плаќа за продукција на рекламни спотови или објави кои ќе се пласираат како платени реклами на „Фејсбук“, „Твитер“ и на други социјални мрежи.

Бошњаковски, кој во последно време дури и пред да биде испратено официјалното соопштение за одлуките на владините седници, со видео преку „Твитер“ соопштува некои битни одлуки на седницата, вели и дека наскоро ќе се почне со одговарање на прашања од граѓаните преку социјалните мрежи.

– Секторот за односи со јавност на Владата планира во иднина да ја зголеми и двонасочната комуникација со граѓаните на социјалните медиуми, преку интензивирано одговарање на пораки и коментари, поставување на прашања до граѓаните, отворање на дискусии и спроведување на онлајн истражувања како алатка за иницирање на вклученост на граѓаните во носење на политиките на Владата. За ваквата и за комуникација со граѓаните преку радиодифузниот сервис МРТВ, Владата нема да троши буџетски пари – вели владиниот портпарол.

Според Бошњаковски, ангажираните лица во владиниот Сектор за односи со јавноста „интензивно работат на креирање на процедури, протоколи и правилници за комуникација преку новите медиуми, кои досега не постоеле“.

Во меѓувреме, комуницираат со граѓаните на социјалните медиуми преку „Фејсбук“, „Твитер“ и „Инстаграм“ и споделуваат фотографии на „Фликр“ и видеа на „Јутјуб“.

– Во иднина планираме отворање и на нови комуникациски канали на социјалните медиуми – појаснува Бошњаковски.

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


ВМРО-ДПМНЕ: Кампањите имаа едукативна функција и донесоа видливи резултати


Скопје, 24 септември, 2017 - 16:13 (META) 

Сè е по закон и нема ништо незаконски, сите средства до последниот денар се распределени по прецизна методологија и доделени низ транспарентен процес, реагираат од ВМРО-ДПМНЕ на прес-конференцијата на портпаролот на Владата, Миле Бошњаковски, на која тој кажа дека кабинетот на поранешниот премиер, Никола Груевски, потрошил 38 милиони евра на рекламни кампањи и на пропаганда.

Од партијата велат дека владејачкиот СДСМ има „очигледна потребата за евтин сензационализам, страв од пораз и потреба за дефокусирање на јавноста“ во пресрет на локалните избори.

„Јавните кампањи на владата на ВМРО-ДПМНЕ имаа едукативна и информативна функција, а епилогот од кампањите беа видливи резултати, 100 нови странски инвестиции, подобрен имиџ на државата, дуплиран број на туристи, зголемен број на патници“, се вели во соопштението.


Кабинетот на Груевски потрошил 38 милиони евра за рекламни кампањи и за пропаганда


Скопје, 24 септември, 2017 - 11:40 (META) 

Кабинетот на поранешниот премиер, Никола Груевски, за периодот од 2008 до 2015 година потрошил 38 милиони евра од буџетот, за рекламни кампањи кои биле емитувани на телевизиите и во електронските медиуми, информираше денеска на прес-конференција портпаролот на Владата, Миле Бошњаковски.

Тој додаде дека во оваа сума не се пресметани трошоците за кампањи во 2006, 2007 и дел од 2016 година, бидејќи недостигале документи за овие години.

Парите, како што информираше Бошњаковски, биле потрошени за кампањите „Трето дете“, „Против абортус“, „Истражи ја Македонија“, „Ден на идеи“ и т.н.

– Овие 38 милиони евра биле потрошени само од кабинетот на поранешниот премиер Никола Груевски. Во оваа сума не влегуваат парите за кампањи што биле потрошени од министерствата. Речиси 15 милиони евра биле дадени на неколку маркетинг-агенции за продукција на кампањи. За истражување на јавното мислење биле потрошени 200.000 евра, но таа бројка не е конечна. За закуп на рекламен простор во електронските медиуми биле потрошени 23 милиони евра – рече Бошњаковски.

Тој додаде дека не постоеле критериуми за распределба на парите за закуп на рекламен простор.

– На пример, на 24 декември 2008 година, во еден ден биле префрлени 2.1250.000 евра на неколку национални телевизии. Ангажман на консултант за еден месец бил платен 30.000 евра. Нејасни се критериуми како се префрлени парите за закуп на рекламен простор. На прв поглед изгледало според рејтинг, но немало критериуми. Одредени национални телевизии добивале повеќе од другите – додаде тој.

Тој кажа дека регионалните и локалните медиуми добивале многу малку пари за реклами или речиси воопшто, но по промена на сопственичката структура добивале значително повисоки суми, па така некои од договорите што се склучувале биле во вредност од 15.000 евра.

Бошњаковски потсети дела новата македонска влада ја прекинала негативната појава да биде најголем маркетиншки огласувач во државата.

Тој додаде дека постои основа за Основното јавно обвинителство да се произнесе за овие трошења.

Минатата седмица портпаролот на Владата, Миле Бошњаковски, исто така на прес-конференција, објави дека претходната влада потрошила повеќе од 31 милион евра од буџетот на државата за рекламирање на бизнис-потенцијалите на земјава во странски медиуми.

 

 

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ – Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка од „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Владата на Груевски потрошила 130 милиони евра за реклами, промотори и за „роуд шоуа“


Скопје, 16 септември, 2017 - 13:48 (META) 

Претходната влада потрошила повеќе од 31 милион евра од буџетот на државата за рекламирање на бизнис-потенцијалите на земјава во странски медиуми, соопшти денеска на прес-конференција портпаролот на Владата, Миле Бошњаковски.

На прес-конференцијата, Бошњаковски ги објави податоците за сумите од буџетот што претходната влада ги потрошила за привлекување странски инвестиции во земјава.

Како што истакна портпаролот на Владата, станува збор за потрошени повеќе од 130 милиони евра.

Покрај трошоците за реклами во странски медиуми, претходната влада предводена од ВМРО-ДПМНЕ и од тогашниот премиер Никола Груевски, за привлекување странски инвестиции во домашните медиуми платила 12,5 милиони евра, за т.н. „роуд шоуа“ биле потрошени 5,6 милиони евра, а економските промотори ги чинеле граѓаните и државата 12,5 милиони евра.

„Како дополнителни приходи, станарини, закуп и друго на министрите без ресор кои биле задолжени за странски инвестиции, им биле исплатени 2,8 милиони евра надвор од месечната бруто-плата“, велат од Владата.

Пред два дена, на прес-конференција Владата објави дека биле потрошени 225 милиони евра за влез на 25 странски компании, кои оствариле 20.000 вработувања.

 

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ – Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка од „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


ЗНМ: Со укинувањето на рекламите ќе прекине коруптивната врска меѓу власта и медиумите


Скопје, 24 август, 2017 - 11:55 (META) 

Укинувањето на рекламите ќе ги ослободи медиумите од финансиската зависност од Владата, која во изминатиот период стана еден од најголемите огласувачи во медиумите, велат од Здружението на новинари на Македонија (ЗНМ), по повод одлуката на Владата да ги укине владините реклами во приватните медиуми.

Од ЗНМ сметаат дека на тој начин „ќе се прекине коруптивната врска помеѓу власта и медиумите, бидејќи преку рекламирањето Владата ги претвори медиумите во пропагандна машинерија и спречуваше каква било јавна критика.“

„Веруваме дека без владини реклами ќе се воспостави нормален медиумски пазар, кој ќе обезбеди поголема финансиска и професионална слобода на медиумите. Иднината на медиумите треба единствено да зависи од подобрувањето на квалитетот на новинарската содржина, со што ќе се врати довербата на граѓаните и на огласувачите“, велат од ЗНМ.

Во однос на најавите дека во иднина целата комуникација со граѓаните ќе оди преку јавниот радиодифузен сервис, од ЗНМ потенцираат дека, „Владата треба да биде транспарентна кон сите медиуми, а не само кон МРТ“.

„Обврска на Владата е да ги прави достапни сите информации од јавен карактер, а од МРТ и приватните медиуми зависи на кој начин тие ќе бидат презентирани. Уредувачката независност на медиумите треба да биде почитувана“, се додава во соопштението на ЗНМ.

 

foom-logo-disklejmerТекстот е изработен во рамки на проектот „Опсерваторија на медиумските реформи“, што го спроведуваат Фондацијата за интернет и општество „Метаморфозис“, „Агора“ Центар за промовирање на граѓански вредности и Платформата за истражувачко новинарство и анализи (ПИНА), со финансиска поддршка на „Фондацијата Отворено општество – Македонија“.
Содржината на текстот е единствена одговорност на авторите и на ниту еден начин не може да се смета дека ги одразува гледиштата на „Фондацијата Отворено општество – Македонија“.


Тасева и Николов од утре ќе следат како партиите трошат пари за изборите


Скопје, 15 ноември, 2016 - 14:21 (META) 

Претседателката на „Транспарентност Македонија“, Слаѓана Тасева, најави дека заедно со Центарот за економски анализи од утре ќе почнат да следат како партиите ќе ги трошат парите во предизборниот период, за изборите на 11 декември.

Тие овој проект го најавија во јануари, по повод предвремeнитe избори во април, но по нивното одложување, проектот беше замрзнат.

– Проектот беше замрзнат со одложувањето на изборите, но од утре официјално ќе почнеме да ги следиме политичките партии – одговори Тасева на прашањето на „Мета“ дали ќе ги следат финансиите на политичките партии.

Претседателката на ТМ, Тасева, и Марјан Николов од Центарот за економски анализи, тогаш истакнаа дека ќе го следат медиумското претставување на партиите, нивните трошоци, како и трошењето на буџетот на централната и на локалната власт за време на предизборниот и на изборниот период.

Дневните весници денеска ги објавија и ценовниците за платено политичко претставување за предвремените парламентарни избори, во согласност со законска обврска на медиумите за објава на ценовници за рекламирање на политичките партии за изборите.

Така, на пример, една внатрешна страница реклама во црно-бел печат чини од 420 до 560 евра, а во боја – 770 евра. Цената на инсертирање прилози се движи од 400 до 800 евра.

Цените за платено политичко претставување не се разликуваат многу од претходните години.


Ратајкоски: МТВ ќе го казни вработениот што згрешил објавувајќи владини реклами


Скопје, 12 септември, 2016 - 15:20 (META) 

МТВ ја увидела грешката и ќе го санкционира вработениот што ја направил грешката со објавувањето на владини реклами, вели Диме Ратајкоски, главен и одговорен уредник на Првиот програмски сервис на Македонската телевизија. Тој за „Мета“ вели дека по добиените насоки од Агенцијата за аудио и аудиовизелни медиумски услуги на 2 септември 2016 година, МТВ ги отстранила сите реклами финансирани од Влада на Република Македонија.

– Првиот програмски сервис на МТВ на 5 септември 2016 година направи детален увид во програмата и го констатираше прекршокот на ад хок телото како точен – вели Ратајкоски.

Тој вели дека се работи за емитување на две владини реклами, „Македонија вработува“ и „Истражи ја Македонија“, емитувани пред третиот телевизиски дневник на 4 септември 2016 година.

– Станува збор за грешка од небрежност и покрај писмената и усна наредба дадена во режија. Водичот на програма, на своја рака, од незнаење и неиформираност од колегите, ненамерно (според изјавите на водичот на програма), го има сторено прекршокот. Во согласност со актите за дисциплински мерки во МРТ, сите вработени што ќе направат каков било прекршок, ќе бидат соодветно санкционирани. Напоменуваме дека по известувањето на Агенцијата за аудио и аудиовизелни медиумски услуги, МРТ ги отстрани сите владини реклами, а во меѓувреме направивме уште една проверка на сите програмски и рекламни форшпани за да не се случи истата грешка – вели Ратајкоски.

Ад хок телото за следење на медиумите во предизборниот период, во петокот (9 септември 2016 г.) ја донесе својата прва одлука, односно поднесе предлог за изрекување прекршочна казна за Првиот програмски сервис на Македонската радиотелевизија (МРТ 1), поради емитување владини реклами.

„Агенцијата за аудио и аудиовизуелни медиумски услуги, по поднесениот предлог од Привремената комисија за следење на медиумското претставување, поднесе барање за поведување прекршочна постапка во која судот ќе изрече прекршочна санкција – опомена против Првиот телевизиски програмски сервис на Македонската радиотелевизија. Прекршувањето се состои во тоа што на програмата на МРТ 1, во периодот од 2 до 5 септември 2016 година, спротивно на член 75-д, став 4 од Изборниот законик, се емитувани реклами финансирани од буџетот на Република Македонија“, стои во соопштението од Агенцијата за аудио и аудиовизуелни медиумски услуги.

Според политичкиот договор на четирите партии од 2 септември 2016 година, до завршување на изборниот процес одговорен уредник на информативното издание на МТВ е Санта Аргирова. Нејзината надлежност е во правилно и етичко известување во информативните емисии (ТВ-дневниците и вестите). Диме Ратајкоски, пак, е главен и одговорен уредник на Првиот програмски сервис на Македонската телевизија, што подразбира дека е надлежен и за другите содржни, како и за рекламите.

Лидерот на СДСМ, Зоран Заев во таканаречената „бомба“ број 24 објави прислушувани разговори помеѓу поранешната министерка за внатрешни работи, Гордана Јанкулоска, и поранешниот премиер Никола Груевски и неговиот тогашен шеф на кабинет, Мартин Протоѓер.


Македонци од Велес со пропагандни портали работат во корист на Доналд Трамп


Велес, 7 април, 2016 - 14:27 (META) 

Најмалку шест веб-страници што пренесуваат пропагандистички вести во корист на потенцијалниот кандидат на Републиканската парија за претседател на САД, Доналд Трамп, се регистрирани од Македонци што живеат во Велес!

Според сопствениците на овие веб-страници, Велес е преплавен со вакви и со слични „портали“ во потрага по повеќе кликнувања и по заработка. Петтемина млади велешани, со кои „Мета“ контактираше, посочуваат дека финансискиот надомест им е најсилниот мотив за регистрирање на веб-страниците.

Дел од нив велат дека ги интересира политика и веруваат оти Доналд Трамп ќе биде следниот кандидат на Републиканската партија за претседател на САД, но не се членови на која било домашна или странска политичка партија.

Сите веб-страници се регистрирани на почетокот од 2016 година, со платен домен за цела година на повеќе различни сервиси за регистрација на домени како „Го дади“ (Godaddy), „Емон“ (Emon), „Фаст домеин“ (FastDomain) и сл.

Откако „Мета“ контактираше со сопствениците, два од домените беа анонимно пререгистрирани на иста адреса во Јута, САД. Сопственик на доменот usadailypolitics.com до 13 часот денеска беше Теодор Индов, 22-годишен студент на ФИНКИ од Велес, кој посочи дека на веб-страницата работи заради кликнувања и посети.

– Размислував што најмногу ги интересира Американците и беше или ова или рагби. Некои од вестите ги пишувам, а дел преземам од други веб-страници и преведувам. Не знам дали се точни или не, јас ова го правам само поради реклами на „Гугл“ (Google ads) – вели Индов.

Иако тој по телефон тврдеше дека не ги познава другите сопственици на домените што објавуваат пропаганда за Доналд Трамп, и сопственикот на доменот usanewsflash.com мистериозно беше променет од Мирон Брезев во анонимен сопственик со истата адреса како и usadailypolitics.com во сојузната држава Јута во САД.

Брезев за „Мета“ изјави дека тој е професор по англиски јазик од Велес и најмногу објавува за Доналд Трамп „затоа што народот најмногу сака да чита за него“.

– Нешто пишувам, нешто преведувам, нешто преземам од други веб-страници. Само прикачувам вести и ништо друго. Најмногу пишувам за Доналд Трамп затоа што народот најмногу сака за него да чита, но пишувам и за други – вели Брезев.

Тој тврди дека со веб-страницата работи сам и никој не му помага.

– Знам дека не е сè точно што се пишува на веб-страницата, исто како што не е точно сè што се пишува и на македонските веб-страници. Но, за секоја вест имам напишано извор од каде е пренесена – вели Мирон Брезев од Велес.

usanewsflash - collage

Откако го контактиравме сопственикот на веб-странцата usanewsflash.com, тој анонимно го пререгистрираше домеинот.

Другите тројца сопственици на „протрамп-портали“ не ги пререгистрираа своите домени откако контактиравме со нив.

Маријанчо Марков, на чие име се води веб-страницата 365usanews.com, пред да го прекине разговорот со нас, само кратко изјави дека нема никаква поврзаност со Доналд Трамп и дека само го интересира политика.

Марио Петруешев, пак, кој е сопственик на worldpoliticus.com, ни се претстави како студент по информатика, а посочи дека на веб-страницата работи за финансиски надомест од интернет-реклами и од „Гугл“.

– Порталот го работам еден месец, пред тоа имав и други, но не дадоа резултат и затоа се решив за портал што ќе ги афирмира политиките на Трамп, затоа што сметам дека ќе победи – вели Петрушев.

Тој вели дека не ги познава лично другите луѓе што имаат слични портали, но ни изјави дека ги нашол на интернет и дека знае за кого станува збор.

Според сопственикот на usapoliticsonline.com, Сашко Димов, кој, исто така, ненадејно го прекина телефонскиот разговор, никој не може да му забрани каков портал да отвори.

– Од љубопитност го отворив овој портал. Ако ве интересира, мислам дека Трамп ќе победи за претседателски кандидат. Сето ова е само забава – рече накратко.

Сторијата за македонските сопственици на „протрамп-поратали“ прв ја обајви „Егзаминер“, чиј автор, Џон Даниелс, одговорен уредник на медиумот, тврди дека овие веб-страници се креирани за неопределените гласачи да се приклонат кон Трамп, додека истовремено го клеветат неговиот опонент во трката за републикански кандидат, Тед Круз.


МТВ од денеска нема да емитува владини реклами


Скопје, 13 ноември, 2015 - 16:25 (META) 

„Македонската радио-телевизија“ го прекинува објавувањето владини реклами и кампањи финансирани од буџетот на Република Македонија, дознава „Мета“.

Според наши извори, вработените на МТВ пред еден час добиле наредба да не пуштаат владини реклами во временските интервали што досега биле предвидени за тоа.

Оваа одлука на МТВ стигнува по соопштението на Агенцијата за аудио и аудиовизуелни медиуми објавено вчера, во кое таа ги известува медиумите дека од 10 ноември 2015 година стапи на сила законот за изменување и за дополнување на Изборниот законик.

Во член 83 од законот за изменување и за дополнување на Изборниот законик, договорен меѓу партиите потписнички на Договорот од Пржино и изгласан во понеделникот се вели:

Од денот на влегувањето во сила на овој Законик до денот на одржување на предвремените избори за пратеници, кои ќе се одржат на 24 април 2016 година, радиодифузерите, печатените медиуми и електронските медиуми (интернет-порталите) не смеат да емитуваат, односно да објавуваат реклами финансирани од буџетот на Република Македонија, од буџетите на општините и на градот Скопје и на сите други лица на кои со закон им е доверено вршење јавни овластувања.

Иако законот стапи на сила на 10 ноември, до денеска (13 ноември) јавниот радиодифузен сервис не го почитуваше член 83 и три дена објавуваше реклами финансирани од буџетот на Република Македонија.