На Шангајската листа и годинава нема универзитети од Македонија


Шангај, 15 август, 2018 - 10:39 (META) 

На Шангајската листа на Академско рангирање на светски универзитети за 2018 година објавена денеска, се наоѓаат илјада универзитети. На прво место 16-та година по ред е Универзитетот Харвард, на второ Стенфорд од САД, а на трето британскиот Универзитет Кембриџ.

Македонските универзитети и годинава не се рангирани на Шангајската листа на најдобри универзитети.

Следните десет најдобри универзитети се МИТ, Беркли, Принстон, Оксфорд, Колумбија, Калтеч и Чикаго.

Универзитетот Цирих, кој е на 19. место, останува да биде најдобро рангиран во Европа, а Копенхашкиот универзитет е второ место, односно на 29. на Шангајската листа.

На трето место во Европа е Универзитетот Сорбона, кој е 36. на листата најдобро рангирани високообразовни институции.

Од земјите во регионот, најдобро рангирани се универзитетите во Белград и во Атина, кои се меѓу 300 и 400 место, а Љубљанскиот, Солунскиот „Аристотел“ и Атинскиот технички универзитет се позиционирани меѓу 400 и 500 место.

Универзитетот во Марибор и Загрепскиот универзитет се меѓу 500 и 600 место. На Шангајската листа е рангиран и Софискиот универзитет меѓу 900. и 1.000 позиција.

 


Македонија за една година падна 24 места на индексот на корупција


Скопје, 25 јануари, 2017 - 13:42 (META) 

Македонија за една година падна 24 места подолу на глобалниот индекс на перцепција на корупцијата (ИПК) на „Транспаренси интернешнел“ (ТИ) и на мерењето за 2016 година е на 90. место, додека на индексот за 2015 година била на 66. позиција.

Тоа е и најголемиот пад што земјава го забележила почнувајќи од 2012 година, кога е воведена сегашната методологија на рангирање за ИПК.

Падот од 24 позиции на листата на 176 држави и територии од целиот свет за нивото на перцепција на корупцијата во јавниот сектор, според д-р Слаѓана Тасева, претседател на „Транспаренси интернешнел – Македонија“, се должи на политиката на клиентелизам и интереси спроведувана од Владата на Република Македонија, со што е создаден систем на заробена држава која ја оневозможува борбата со корупцијата и ги штити корумпираните.

– Владата на Република Македониjа, која повеќе години водеше политика заснована на клиентелизам и на интереси, не само што ги занемаруваше сите укажувања за ескалација на проблемот со корупцијата, туку со воспоставувањето на системот на заробена држава го оневозможи работењето на институциите задолжени за борба против корупцијата. На овој начин се создаде силно изразен систем на заштита на корумпираните и систем во кој наспроти правото, владеат интереси – вели Тасева.

Индекс корупција 2016 - прес на Транспаренси интернешнл Македонија 25012017

Индексот го презентираше Дона Димов, истражувач на Транспаренси Интернешнл – Македонија

„Транспаренси интернешнел – Македонија“, која денеска го презентираше ИПК за 2016 година, подготви и ранг-листа за регионот, кој ги опфаќа земјите на поранешната територија на СФРЈ плус Бугарија, на кој Македонија е претпоследна. Полоша е состојбата само во Косово, кое е на 95. место, додека Босна и Херцеговина е 7 места повисоко од нас  – на 83. позиција.

Но, состојбата не е алармантна само во поглед на регионот. Со ИПК за 2016 година, Македонија е 9. на листата на земји со најголем пад на рангот, односно имаме ист пад, од 24 места, со Суринам, а полошо поминале Тајланд, Белорусија, Мексико, Тринидад и Тобаго…

За една година, Македонија во поглед на поените според кои се врши рангирањето, бележи пад од пет поени, односно ако во 2015 година добила 42 поени, за една година оценката е намалена и во 2016 година добила 37 поени.

– Резултатот заснован на седум нови истражувања, укажува на тоа дека корупцијата е согледана како сериозен проблем за развој на економијата, за владеење на правото, за странски инвестиции и за стабилна демократија. Тоа создава недоворба на граѓаните во капацитетите на државата и во институциите. Недопирливоста на одговорните за корупција е секојдневие кое треба да се искорени, а синџирот на корумпираност во високите ешалони на сите власти да се прекине. Тоа е одговорност на претседателот на државата, на новоизбраните пратеници, на тие што ќе формираат влада, на вработените во институциите и во судството. Тоа е одговорност и на граѓаните, кои ги охрабрувам да ѝ се спротистават и да ја оневозможат корупцијата во име на иднината – порачува претседателка на „Транспаренси интернешнел – Македонија“.

На годинашната листа, Данска и Нов Зеланд со 90 поени се на првото место, а по нив следат Финска (89) и Шведска (88). Иако ниту една земја не е без корупција, државите кои се на врвот делат карактеристики како отворена влада, слобода на медиумите, граѓански слободи и независни судски системи, велат од ТИ, појаснувајќи дека годинава поголем е бројот на земји што паднале на листата, отколку на тие што се искачиле.

Индексот на перцепција на корупцијата претставува збир на податоци од голем број различни извори кои ги претставуваат перцепциите на бизнисмените и на експертите во однос на нивото на корупција во јавниот сектор во земјите. При рангирањето на Македонија, обработувани се податоците од извештаите што ТИ ги добила од фондацијата „Бертелсман ТИ“, Светскиот економски форум, Светскиот проект за правда РОЛ, „Интелиџенс јунит“ на „Економист“, „Глобал инсајт“, „Фридом хаус“ и проектот „Веритис оф демокраси“.


Македонија е на 10. место во извештајот „Дуинг бизнис“ на Светска банка


Вашингтон, 26 октомври, 2016 - 9:26 (META) 

Македонија се наоѓа на 10. место во извештајот на Светска банка „Дуинг бизнис“ за 2017 година и е за две места подобро рангирана од лани.

Во рамките на овој извештај се истражуваат законите што ја зголемуваат бизнис-активноста и оние што ја ограничуваат.

Македонија е највисоко рангирана во категоријата почнување бизнис и е на 4. место во светот. Во категоријата плаќање даноци сме на 9. место, додека во категоријата заштита на малцинските инвеститори сме на 13. место. За издавање градежни дозволи  сме рангирани на 11. место во светот.

Најлоши оценки оваа година имаме во категоријата регистрирање имот, во која сме рангирани на 48. место.

Лани, угледниот меѓународен неделник „Економист“ даде сериозни забелешки во однос на рангирањето на земјите во извештајот „Дуинг бизнис“ (Doing Business) на Светската банка, изразувајќи загриженост поради одредени негови недостатоци.

Според овој магазин, поголем број земји кои високо котираат или, пак, имаат брз подем на листата „Дуинг бизнис“, во суштина се – сиромашни.

Ова е 14. извештај „Дуинг бизнис“ на Светска банка, во кој се рангираа 190 економии во светот.


Македонија е рангирана на 58. место на листата за најиновативни економии во светот


Њујорк, 17 август, 2016 - 13:56 (META) 

Македонија е рангирана на 58. место во извештајот на Обединети Нации за најиновативни економии во светот.

Швајцарија, Шведска, Велика Британија, САД и Финска се пет топ земји на оваа листа каде што компаниите се фокусирани на истражување и развој, извоз на висока технологија и иновативни производи.

Глобалниот иновативен индекс на ОН, вклучува 128 земји.


„Дуинг бизнис“: Македонија на 12. место од 189 економии во светот


Вашингтон, 28 октомври, 2015 - 9:13 (META) 

Според најновиот извештај „Дуинг бизнис“ (Doing Business) на Светска банка, Македонија е на 12. место од 189 економии во светот.

Во областа на почнување бизнис, земјата е второрангирана, а според извештајот, тоа се должи на поедноставувањето на процедурите преку интернет-регистрацијата.

Во категоријата плаќање даноци, Македонија е на седмо место.

Угледниот меѓународен неделник „Економист“ неодамна даде сериозни забелешки во однос на рангирањето на земјите во извештајот „Дуинг бизнис“, изразувајќи загриженост поради одредени негови недостатоци.

Неделникот пишува дека поголем број земји кои високо котираат или, пак, имаат брз подем на листата „Дуинг бизнис“, во суштина се – сиромашни.

За да добијат поповолно место на листата, овие држави се склони кон странски директни инвестиции или помош, што, доколку стане цел на политиката на една влада, не е сигурен начин за водењето на националната економија.

Притоа, не се земаат предвид важни елементи на бизнис-климата, како што се безбедност, корупција, големина на пазарот, финансиска стабилност, инфраструктура и знаење.


Истражување: Македонија има најлош здравствен систем во Европа


Белград, 20 август, 2015 - 13:20 (META) 

Македонија има најлош здравствен систем во Европа, а Франција има најдобар, пишува „Бизнис Инсајдер“, објавувајќи ги резултатите од  истражувањето на српскиот независниот истражувачки центар „Нумбео“. Франција е на врвот на листата со 82,58 поени, а Македонија е на дното со 35,12 поени,

„Нумбео“ ги комбинира локалните податоци со уникатниот Индекс на здравствена заштита, при што се добива единствена мерка за состојбата на здравствениот систем на секоја земја.

По Франција, европски земји со најдобар здравствен систем се Малта, Данска, Австрија и Кипар. На последните пет места во Европа, пред Македонија, се Исланд, Романија, Белорусија и Украина.

На светско ниво Јапонија има најдобар резултат со 87,07 поени, а потоа следат Бахреин и Тајван кои и претходат на Франција.

Македонија е на 100 место, а зад неа се само Виетнам, Ирак, Монголија, Азербејџан и Хондурас на последното место.

 


Стејт департмент: Македонија успешно се справува со трговијата со луѓе


Вашингтон, 28 јули, 2015 - 14:03 (META) 

Стејт департментот на Соединетите Американски Држави (САД) во својот најнов извештај за состојбата со трговијата со луѓе во светот, ја рангира Македонија во групата ТИЕР 1, односно земји што ги исполнуваат стандардите за борба против овој вид криминал.

Македонија е единствената земја од регионот што е рангирана во ТИЕР 1, заедно со уште 32 држави што ги исполнуваат минималните стандарди при справување со трговијата со луѓе, меѓу кои се Австрија, Германија, Данска, Финска, Франција, Чешка, Канада, Норвешка, Холандија, Белгија, Швајцарија, Шведска.

Македонија по петти пат е рангирана во оваа група држави.

Во извештајот е нотирано покренувањето истрага против седуммина полициски службеници поврзани со трговија со луѓе и пресудата против четворица од нив. Истакнато е зголемувањето на средствата за помош на жртвите на трговијата со луѓе, како и идентификувањето на првата жртва која била присилена на питачење, но е намален вкупниот број на идентификувани жртви во споредба со 2013 година.

Во извештајот се наведува дека во 2014 година само две лица биле осудени за ваков вид криминал, што според Стејт департментот, е најмал број судски пресуди за вакви случаи од 2009 година, а нотирани се и случаи во кои полициски и трудови инспектори, наводно, примале мито во случаи поврзани со трговија со луѓе.

Од Министерството за внатрешни работи го поздравија извештајот на Стејт департментот, од каде нагласуваат дека „фактот дека Македонија остана лидер во регионот, за нас како Министерство, но и за Националната комисија за борба против трговијата со луѓе, во која партиципираме, значи обврска за сериозна анализа на извештајот и за постапување по препораките“.

Како и во претходните, и во овој извештај Македонија е оценета како „земја извор, транзит и дестинација на мажи, жени и на деца кои се принудени на сексуална и на трудова експлоатација. Македонските жени и девојки се предмет на сексуална и на трудова експлоатација во ресторани, барови и во ноќни клубови во земјава. Децата, пак, главно од ромската популација, преку нивни роднини се сексуално експлоатирани преку таканаречените принудни бракови. Жртвите во Македонија, главно, доаѓаат од Источна Европа или земјите од соседството, додека македонските државјани се жртви на сексуална или трудова експлоатација во земјите од Јужна, Централна и од Западна Европа“, стои во извештајот на Стејт департментот на САД.


„МИТ Технолоџи ривју“ рецензира студија на македонски научници


Бостон, 24 март, 2015 - 17:23 (META) 

Студентката Верица Лазова и нејзиниот професор Ласко Баснарков од Факулетот за информатички науки и компјутерско инженерство (ФИНКИ), нашле нов начин да го искористат популарниот алгоритам за рангирање на интернет-страници на „Гугл“, овојпат за правење ранг-листа на најдобрите фудбалски репрезентации на сите времиња.

Рецензија на нивната студија пред десетина дена објави престижниот портал „МИТ Технолоџи ривју“(MIT Technology Review).

За да создадат комплетно рангирање на националните фудбалски селекции, Лазова и Баснарков ги користеле резултатите од дваесетте Светски првенства (Мундијали), почнувајќи од првиот турнир во Монтевидео (Уругвај) во 1930 година до последниот одигран, летото минатата година во Бразил.

Тие тргнуваат од претпоставката дека еден тим треба да биде високо рангиран доколку победил други високо рангирани тимови.

Македонските научници ги зеле резултатите од повеќе од 7.000 натпревари, одиграни помеѓу 210 земји. Тие потоа креирале мрежа во која тимовите се јазли, меѓу кои постојат врски доколку играле еден против друг. Јачината и поларитетот на врските зависи од резултатите, кој кого победил итн. На крајот, Лазова и Баснарков го применуваат алгоритмот за рангирање за повеќе повторувања за да го направат рангирањето.

Резултатите што ги добиле се интересни за секој вљубеник во фудбалот, пишува „МИТ Технолоџи ривју“ (MIT Technology Review).

Најдобро рангиран тим е Бразил, што не е изненадување, бидејќи е единствениот тим што учестувал на сите Светски првенства и има освоено најмногу титули, вкупно пет. По Бразил, следуваат Италија, Германија, Холандија, Аргентина, Англија, Шпанија, Франција и Чехословачка, по овој редослед.

Лазова и Баснарков својата ранг-листа потоа ја споредиле со „вечната“ листа на светската фудбалска организација ФИФА и забележале сличности, но и битни разлики. Бразил е, секако, прв на двете листи, но Холандија е осма на ФИФА-листата, а на нивната е четврта. Репрезентацијата на Данска, пак, е седумнаесетта на нивната, но дваесет и петта на „вечната“ листа на ФИФА. Од друга страна, репрезентацијата на Чехословачка воопшто ја нема во рангирањето на ФИФА, откако државата престана да постои во 1993 година.

Како што се наведува во рецензијата на „МИТ Технолоџи ривју“, студијата е интересен пристап кој ја покажува корисноста на алгоритамот за рангирање на „Гугл“, кој овозможува рангирање во помалку или повеќе секоков тип мрежи.

„Очигледно, овој пристап може да се користи за креирање слични рангирања за американски фудбал, кошарка, крикет или, помалку или повеќе, за секој спорт“, се вели во рецензијата.

Алгоритмот за рангирање на интернет-страниците стана еден од најпознатите во компјутерската наука. Тој бил направен за рангирање интернет-страници според нивното значење според нејзината поврзаност со други важни страници. Алгоритмот работи броејќи ги врските до одредена интернет-страница и значењето на страниците од каде доаѓаат врските. Со процес на итерација алгоритмот создава ранг.

Алгоритмот бил развиен од основачите на „Гугл“, Лери Пејџ и Сергеј Брин, во средината на 1990-те години, а истражувачите почнале да го користат за рангирање врски во други мрежи.


Македонија е на 101. место на ФИФА-листата


Цирих, 8 јануари, 2015 - 16:43 (META) 

Македонската фудбалска репрезентација забележа пад од едно место на најновата ранг-листа на ФИФА и се наоѓа на 101. место со 327 поени.

Ова е прва листа на ФИФА за 2015 година и не се забележуваат некои поголеми промени. Првите 10 на новата листа на ФИФА се со ист резултат. Прв на листата е актулениот светски шампион Германија со 1.725 поени, вторa е Аргентина, третa Колумбија, четвртa Белгија, а петтa е репрезентацијата на Холандија.

Од нашите противници за квалификациите за Европското првенство во 2016 година, подолу на табелата е само Луксембург, на 127. позиција, а останатите се на позициите од претходното рангирање. Шпанија е на девето, Словачка на 21. место, Украина на 25. позиција и Белорусија на 99 место.