Подобрување на рангирањето за 24 места за Северна Македонија на Индексот на корупција на Транспаренси Интернешенл (ТИ) за 2021 година. Од претходното 111-то место, земјава лани се искачи на 87-то место како резултат на подобрување на човековите права, организираните избори, реформските процеси, судските процеси за висока корупција, работењето на Државната комисија за борба против корупцијата и владиниот Акциски план за борба против корупцијата.
И покрај остварениот напредок во споредба со претходните години, Северна Македонија со освоени 39 поени од вкупно 100 го дели 87-то место со Косово, Колумбија, Мароко, Гвајана, Етиопија, Суринам, Танзација и Виетнам со кои има идентичен број поени, а од непосредниот регион во 2021 година зад нашата земја се наоѓаат Србија на 96-то место, Албанија и Босна и Херцеговина на 110-тото место.
Подоброто рангирање на Индексот на корупција е резултат и на бодовите што земјава ги има добиено од извештаите и истражувањата на седум независни меѓународни организации. Од седумте истражувања, во пет има напредок, додека во извештаите на „Фридом хаус“ и „Глобал инсајт“ земјата има резултат како и претходната година.
Индексот за перцепција на корупцијата (ИПК) рангира вкупно 180 земји и територии според перцепирани нивоа на корупција во јавниот сектор на скала од 0 (многу корумпирано) до 100 (некорумпирано). Најдобро рангирани во светот лани се Данска, Финска, Нов Зеланд, Норвешка и Сингапур, додека на дното на Индексот на корупција на ТИ се наоѓаат Јужен Судан, Сирија, Сомалија, Венецуела и Јемен.
Политичките партии денеска реагираа по објавеното рангирање на земјава во однос на борбата против корупцијата.
Богданка Кузеска од СДСМ рече дека скокот од 24 места е најдоброто рангирање на Северна Македонија во изминативе шест години на Индексот на корупција, посочувајќи дека државата презела чекори за кривично гонење на високи функционери за корупција и зајакнување на независните надзорни институции.
Претседателот на ВМРО-ДПМНЕ Христијан Мицкоски пак реагираше со статус на Фејсбук, посочувајќи дека на Индексот на корупција на ТИ повторно сме рангирани меѓу најкорумпираните земји во Европа.