Македонскиот пасош се најде на 36. место на листата најмоќни пасоши објавени од страна на платформата „Паспорт индекс“. Веднаш зад македонскиот пасош се црногорскиот и турскиот. Од државите во регионот, бугарскиот пасош е на 9. место, српскиот на 32, додека хрватскиот е на осмо место.
Првото место го зазема пасошот на Обединетите Арапски Емирати, второто место припаѓа на Германија, Шпанија, Франција, Италија и Холандија (држави со чии патни исправи може да се патува во над 170 држави без виза или со виза на гранични премини), а третото на Шведска, Финска, Луксембург, Австрија и Швајцарија.
Според индексот на македонскиот пасош, со него без виза може да се патува во 81 држава, виза е потребна за во 68 држави, а во 49 визата се добива на граничен премин.
Со прворангираниот, најмоќен пасош, без виза може да се патува во 130 држави, виза е потребна во 18 држави, додека во 50 визата се издава при влез во државата.
Најдолу на листата, на 98 место е сирискиот пасош, со кој може да се патува без виза во само 8 држави, а слично се рангирани и патните исправи на Авганистан, Ирак, Сомалија и Пакистан.