!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

ВМРО-ДПМНЕ и ДУИ си контрираат за законот за јазиците во Собранието


Скопје, 28 март, 2017 - 13:54 (META) 

Пратениците на денешното второ продожение на конститутвината седница, како и вчера, наместо да дискутираат по првата точка за избор на членови и на претседател на Комисијата за избори и за именувања, најголемиот дел од дебата го поминаа во дискусија за палтформата на албанските партии и за употребата на законот за јазиците.

Артан Груби од ДУИ рече дека албанската платформа не задира во унитарниот карактер на државата, не предизвикува кантонизација и федерализација и дека ДУИ не се залага за поделба на Македонија.

Илија Димовски од ВМРО-ДПМНЕ нагласи дека проблемот е што пратениците не се запознаени со содржината на законот за јазиците.

Пратеникот на ДУИ, Џевад Адеми, пак, истакна дека проблемот во преговорите меѓу ВМРО-ДПМНЕ и ДУИ било Специјалното јавно обвинителство, а не законот за јазиците.

– Проблемот беше продолжувањето на рокот на СЈО за поднесување обвиненија, а тоа го кажаа сите челници на ДУИ. Не беше проблемот ниту законот за јазиците, ниту претседателот на Собранието – рече Адеми, кој ги повика пратениците да изгласаат претседател на Собранието и да не го губат времето.

Антонио Милошоски од ВМРО-ДПМНЕ истакна дека не е правилно да се прескокне третата точка од дневниот ред на седницата, за избор на членови и на претседател на Комисијата за избори и за именувања, и да се премине на која било друга.

– Не може никој да ѝ оневозможи на Комисијата за избори и за именувања да предложи кандидат за претседател на Собранието. Поважни се дебатата и аргументите отколку брзањето – рече Милошоски.

Пратеникот Ферид Мухиќ од говорницата им се обрати на пратениците на ВМРО-ДПМНЕ и им рече дека немаат право да кажуваат дека тие го сакаат народот повеќе од другите и дека сите пратеници се избраници на народот.


Денеска нова седница со стари позиции и со деловнички блокади


Скопје, 28 март, 2017 - 9:40 (META) 

Конститутивната седница на Собранието, на која се расправа за избор на претседател, заменик-претседател, членови и нивни заменици на Комисијата за избори и за именувања, ќе продолжи денеска напладне.

Вчера, 20 пратеници поднесоа предлог за кандидат за претседател на Собранието на Република Македонија да биде Талат Џафери.

Разврската останува неизвесна, како поради бројот на пријавените пратеници за дискусија, така и поради генералната атмосфера на конфронтации и на високи тонови и навреди. ВМРО-ДПМНЕ постојано бара дистанцирање од т.н. платформа на Албанците и нејзините пратеници тврдат дека изборот на Албанец за претсeдaтел на Собранието би бил доказ дека тој документ е на сила. СДСМ вели дека противниците само купуваат време и го блокираат процесот „за да не одат в затвор“. Дополнителна компликација внесува одлуката на Беса да не ја поддржи кандидатурата на Талат Џафери за претседател на Собранието.

Вчера речиси целата седница помина во реплики и во контрареплики на пратениците на ВМРО-ДПМНЕ за платформата на Албанците, како и „за зачувување на унитарноста и на суверентетот на државата“.

Пратеникот на ВМРО-ДПМНЕ и претседател на Комисијата за избори и за именувања, Илија Димовски, рече дека пратениците на ВМРО-ДПМНЕ „го црпат правото за дебатирање од демократијата“.

– Легитимно е 20 пратеници да го предoлжат Џафери, но тие не смеат да го блокираат правото на Комисијата или на други 20 пратеници да предложат кандидат – рече Димовски.


Пратениците далеку од договор, седницата продолжува утре напладне


Скопје, 27 март, 2017 - 19:43 (META) 

Конститутивната седница на Собранието на која се расправа за избор на претседател, заменик-претседател, членови и нивни заменици на Комисијата за прашања на изборите и именувањата ќе продолжи утре напладне.

Пратеникот на СДСМ, Оливер Спасовски побара седницата да продолжи и по 18 часот, но Вељаноски не се согласи да ја продолжи седницата и нејзино продолжување закажа за утре во 12 часот.

Речиси целата седница помина во реплики и контрареплики на пратениците на ВМРО-ДПМНЕ за платформата на Албанците како и „за зачувување на унитарноста и суверентетот на државата“.

Џеват Адеми од ДУИ го праша пратеникот на ВМРО-ДПМНЕ, Антонио Милошоски од кога му пречи платформата на албанските партии.

– Од кога колега Милошоски ви пречи т.н. платформа од Тирана која не постои. После 29-ти? Ни пред 29-ти не постоеше, како што не постои ни после 29-ти. Албанците во Македонија имаат легална, легитимна, демократска политичка елита и немаат потреба од инструкции, немаат потреба од наметнати „документи“ и немаат потреба да бидат ничии аргати за други цели – рече Адеми.

Во меѓувреме 20 пратеници поднесоа предлог за кандидат за претседател на Собранието на Република Македонија да биде Талат Џафери. Пратеникот на СДСМ, Петре Шилегов рече дека реплицирањето на пратениците на ВМРО-ДПМНЕ сами на себе е кршење на деловникот и дека ако тоа продолжи ќе се случи колабирање на системот.

Пратеникот на ВМРО-ДПМНЕ и претседател на Комисијата за избори и именувања, Илија Димовски рече дека пратениците на ВМРО-ДПМНЕ го црпат правото за дебатирање од демократијата.

– Деловникот на Собранието дава две алтернативи за предлагање кандидат за претседател на Собранието, а тоа е преку Комисијата за избори и именувања и преку предлог на 20 пратеници. Едната алтернатива не ја поништува другата. Легитимно е 20 пратеници да го предложат Џафери, но, тие не смеат да го блокираат правото на Комисијата или на други 20 пратеници да предложат кандидат – рече Димовски.

Движењето Беса соопшти дека нема да ја поддржи кандидатурата на Талат Џафери за претседател на Собранието и дека предложиле нивен пратеник за кого рекоа дека е човек кој е со кредибилитет и не е поврзан со криминал и корупција, но дека нивниот кандидат не бил земен в предвид од СДСМ, ДУИ и Алијанса на Албанците.


Димовски: ВМРО-ДПМНЕ не блокира, туку „од демократијата го црпи правото за дебатирање “


Скопје, 27 март, 2017 - 15:52 (META) 

Работата на Комисијата за избори и именувања е беспредметна затоа што денеска поднесовме предлог од 20 пратеници за кадидат за претседател на Собранието на Република Македонија, а тоа е Талат Џафери, рече на прес-конференција пратеникот на СДСМ, Петре Шилегов.

– Граѓаните се сведоци кој сака да ја продолжи кризата. Реплицирањето на пратенциите на ВМРО-ДПМНЕ сами на себе е кршење на деловникот. Ако дозволиме ова блокирање да продолжи ќе имаме колабирање на системот. Апелираме веднаш да прекине кршењето на деловникот, а ВМРО-ДПМНЕ е должна да прекине со ова однесување. Во моментов дебатираме за точка која не е битна – рече Шилегов.

Пратеникот на ВМРО-ДПМНЕ и претседател на Комисијата за избори и именувања, Илија Димовски рече дека пратениците на ВМРО-ДПМНЕ го црпат правото за дебатирање од демократијата, а проблем е тоа што пратениците од СДСМ не се пријавени за дебата.

– Деловникот на Собранието дава две алтернативи за предлагење кандидат за претседател на Собранието, а тоа е преку Комисијата за избори и именувања и преку предлог на 20 пратеници. Едната алтернатива не ја поништува другата. Легитимно е 20 пратеници да го предложат Џафери, но, тие не смеат да го блокираат правото на Комисијата или на други 20 пратеници да предложат кандидат – рече Димовски, кој не сакаше да одговори на новинарско прашањето дали ВМРО-ДПМНЕ имаат кандидат за претседател на законодавниот дом.

Тој рече дека третата точка од дневниот ред, за избор на членови на Комисијата за избори и именувања, мора да помине, за да продолжи било која друга.

На новинарско прашање со кого ВМРО-ДПМНЕ дебатира изминатите два часа во Собранието, Димовски одговори дека дебатираат со граѓаните.


Груевски замина на конгрес на сестринските партии на Малта


Скопје, 27 март, 2017 - 13:16 (META) 

Лидерот на ВМРО-ДПМНЕ, Никола Груевски од денеска па во наредните неколку дена, заедно со партиска делегација ќе присуствува на конгресот на Европската народна партија (ЕПП), што се одржува на Малта, потврди за „Мета“, директорот на центарот за комуникации на ВМРО-ДПМНЕ, Иво Котевски.

Посетата на Груевски на Малта и учеството на конгресот на ЕПП, доаѓа во време кога Собранието треба да биде избран нов претседател на законодавниот дом, како услов за продолжувањето на процесот за формирање на влада, по изборите на 11 декември, минатата година.

Престојот на Груевски на конгресот на ЕПП, како што ни изјави Котевски, меѓудругото „ќе биде искористен за билатерални средби со луѓе од европскиот политички естаблишмент.“

– На конгресот на Европската народна партија ќе присутвуваат политичките функционери од Европа кои припаѓаат на десничарските политички партии кои се највлијателната политичка сила во рамките на Европската Унија. Во рамките на престојот меѓудругото ќе се презентираат ставовите во однос на актуелните домашни случувања, политичката криза, како и стратешките интереси на Република Македонија – вели Котевски.

Во Малта, на самитот на ЕПП се очекува да присуствуваат германската канцеларка Ангела Меркел, премиерот на Шпанија Марио Рахој, премиерката на Норвешка, Ерна Солберг, ирскиот премиер, Енда Кени, премиерот на Унгарија, Виктор Орбан, претседателот на ЕПП – Јозеф Дол, како и претседателите на Европската комисија и на Советот на ЕУ, Жан Клод Јункер, односно Доналд Туск.


Продолжи конститутивната седница – дипломатите седнаа на местата на новинарите


Скопје, 27 март, 2017 - 12:49 (META) 

Со половина час доцнење претседателот на Собранието од претходниот состав, Трајко Вељаноски по тримесечна пауза го отвори продолжението на конститутивната седница.

Седницата почна на 30 декември, минатата година, а беше прекината бидејќи немаше договорено парламентарно мнозинство и пратениците не можеа да изберат претседател на законодавниот дом.

На денешното продолжени на конститутивната седница, единствени две точки на дневен ред се изборот на членови на Комисијата за избори и именувања и избор на претседател на Собранието.

Новинарите седницата ја следат од прес-центарот во Собранието, затоа што во галеријата се присутни претставници на дипломатскиот кор.

И на овој настан се гледа како на шанса за продолжување на процесот за формирање влада по изборите на 11 декември минатата година, но таа шанса е неизвесна како поради големите разлики помеѓу двете најголеми политички партии, СДСМ и ВМРО-ДПМНЕ.


Собрание: Извесно е само дека седницата ќе почне, сè друго е до волјата за излез од кризата


Скопје, 27 март, 2017 - 9:42 (META) 

Парламентарните политички партии денеска, по три месеци пауза и преговори, ќе ја продолжат конститутивната седница на Собранието, која почна на 30 декември минатата година, а беше прекината затоа што немаше договорено парламентарно мнозинство и пратениците не можеа да изберат претседател на законодавниот дом.

Според агендата на денешното продолжение на конститутивната седница, кое е закажано за 12 часот, единствени две точки на дневен ред се изборот на членовите на Комисијата за избори и за именувања и избор на претседател на Собранието.

И на овој настан се гледа како на шанса за продолжување на процесот за формирање влада по изборите на 11 декември минатата година, но таа шанса е неизвесна како поради големите разлики помеѓу двете најголеми политички партии, така и поради фактот што и досега партијата на Груевски ја користеше секоја можност да го блокира или барем да го забави процесот.

Од СДСМ веруваат дека денеска ќе се избере новиот претседател на законодавниот дом, додека од ВМРО-ДПМНЕ велат дека единствената точка на дневен ред ќе биде изборот на членовите на Комисијата за избори и за именувања.

Имено, партиите по неколку дена преговарање, во четвртокот минатата недела одлучија Комисијата за избори и за именувања да има шест членови од ВМРО-ДПМНЕ, пет од СДСМ, ДУИ и Беса да имаат по еден член, а претседател да биде Илија Димовски од ВМРО-ДПМНЕ.

– Според процедурата, треба да се свика седница на Комисијата за прашања на избори и на именувања, таму да се разгледаат еден, два, три, десет или сто предлози за претседател на Собранието и утврдениот предлог од Комисијата да се достави до претседавачот на конститутивната седница, и тогаш тој ќе може да свика седница за избор на претседател на Собранието – изјави Димовски, без да каже дали тие како партија ќе имаат свој предлог за претседател на Собранието.

Лидерот на СДСМ, Зоран Заев, во вчерашното интервју за „Канал 5“ рече оти верува дека денеска ќе се избере претседателот на Собранието и ја повика ВМРО-ДПМНЕ да не тактизира дека ќе се гласа само за Комисијата за избори и за именувања.

– Ако не се избере утре, ќе има седница задутре, тоа е демократијата. Ако треба да трае седницата цела ноќ, нека трае. Испраќам порака да не се обидуваат да прават некаков вид манипулации. Ќе ни треба ВМРО-ДПМНЕ за спроведување реформи, затоа мора да соработуваме. Не сакаме да размислуваме на други решенија, тоа е лоша практика за Македонија – рече Заев.

Во петокот минатата недела, портпаролот на ДУИ, Бујар Османи, изјави дека Талат Џафери ќе биде кандидат за претседател на Собранието, за кој кажа дека има поддршка од парламентарното мнозинство.

За кандидатот на ДУИ за претседател на Собранието, Заев во вчерашното интервју рече дека тој е еден од посериозните кандидати затоа што поседува најголемо искуство.

– Мене ми е важно сите потенцијални партнери да веруваме во решението што ќе го избереме. Потребно е новиот претседател на Собранието да биде човек со капацитет, кој има искуство и да има разбирање за идната опозиција, па дури да прифати предлог од нив затоа што демократијата значи толеранција и разбирање – додаде Заев.

Раководството на Беса, пак, соопшти дека нема да го поддржи Талат Џафери и одлучи да предложи свој кандидат за собраниски спикер. Портпаролот на оваа партија, Орхан Муртезани, не откри имиња, но според неофицијални информации од партијата, тоа ќе биде Африм Гаши или Фадил Зендели.

– Движењето Беса не донесе одлука за поддршка на Талат Џафери за собраниски спикер. Последната одлука на централното раководство на Движењето Беса е и ние да предложиме свој кандидат за претседател на Собранието. Додека нема поинаква одлука од раководството, ние остануваме на ставот да имаме свој кандидат за таа функција – изјави Гаши.

Претседател на Собранието според Уставот и деловникот се избира и се изгласува со мнозинство од 61 глас од пратениците.

Пратеникот на ВМРО-ДПМНЕ и претседател на Комисијата за избори и именувања, Илија Димовски, вчера во интервју за „Сител“, рече дека неговата партија ќе ги почитува Уставот, деловникот за работа на Собранието и законите, но ќе се бори за да ги зачува државните и националните интереси.

ВМРО-ДПМНЕ останува на ставот за нови предвремени парламентарни избори, затоа што, како што рече Димовски, бројките и соодносот во Собранието не гарантираат стабилно Собрание.


Еден, два, три, десет или сто предлози за нов спикер на утрешната седница на Собранието


Скопје, 26 март, 2017 - 12:08 (META) 

Парламентарните политички партии утре, по три месеци пауза и преговори, ќе ја продолжат конститутивната седница на Собранието, која почна на 30 декември минатата година, а беше прекината затоа што партиите немаа договорено парламентарно мнозинство и не можеа да изберат претседател на законодавниот дом.

Според собраниската агенда, за утре во 12 часот е закажано продолжението на конститутивната седница, а како единствени две точки на дневен ред се предвидени изборот на членовите на Комисијата за избори и за именувања и избор на претседател на Собранието.

Партиите по неколку дена преговарање одлучија Комисијата за избори и за именувања да има шест членови од ВМРО-ДПМНЕ, пет од СДСМ, ДУИ и Беса да имаат по еден член, а претседател да биде Илија Димовски од ВМРО-ДПМНЕ.

Димовски најави дека утре единствена точка по која Собранието ќе расправа и ќе одлучува е изборот на составот на Комисијата за прашања на избори и на именувања.

– Потоа, според процедурата, треба да се свика седница на Комисијата за прашања на избори и на именувања, таму да се разгледаат еден, два, три, десет или сто предлози за претседател на Собранието и утврдениот предлог од Комисијата да се достави до претседавачот на конститутивната седница, и тогаш тој ќе може да свика седница за избор на претседател на Собранието – изјави Димовски, без да каже дали тие како партија ќе имаат свој предлог за претседател на Собранието.

Пред два дена, портпаролот на ДУИ, Бујар Османи, изјави дека Талат Џафери ќе биде кандидат за претседател на Собранието, за кој кажа дека има поддршка од парламентарното мнозинство.

Вчера на новинарско прашање дали СДСМ ќе предложи кандидат за претседател на Собранието или ќе го поддржи кандидатот на ДУИ, Јагода Шахпаска рече дека утре на продолжувањето на конститутивната седница на Собранието ќе биде соопштено она што претставува договор на 67 пратеници од новото парламентарно мнозинство околу кадровското решение за нов претседател на Собранието.

Раководството на Беса нема да го поддржи кандидатот на ДУИ за претседател на Собранието, Талат Џафери, и одлучи да предложи свој кандидат за собраниски спикер. Портпаролот на оваа партија, Орхан Муртезани, не открива имиња, но според неофицијални информации од партијата, тоа ќе биде Африм Гаши или Фадил Зендели.

– Движењето Беса не донесе одлука за поддршка на Талат Џафери за собраниски спикер. Последната одлука на централното раководство на Движењето Беса е и ние да предложиме свој кандидат за претседател на Собранието. Додека нема поинаква одлука од раководството, ние остануваме на ставот да имаме свој кандидат за таа функција – изјави Гаши.

Претседател на Собранието според Уставот и деловникот се избира и изгласува со мнозинство од 61 глас од пратениците.


Беса нема да го поддржи Џафери, ќе предложи свој кандидат за претседател на Собрание


Скопје, 26 март, 2017 - 10:29 (META) 

Раководството на Движењето Беса нема да го поддржи кандидатот на ДУИ за претседател на Собранието, Талат Џафери, и одлучи да предложи свој кандидат за собраниски спикер, објави „Tелевизија 21“. Портпаролот на оваа партија, Орхан Муртезани, не открива имиња, но според неофицијални информации на партијата, станува збор за Африм Гаши или Фадил Зендели.

– Движењето Беса не донесе одлука за поддршка на Талат Џафери за собраниски спикер. Последната одлука на централното раководство на Движењето Беса е и ние да предложиме свој кандидат за претседател на Собранието. Додека нема поинаква одлука од раководството. ние остануваме на ставот да имаме свој кандидат за таа функција – изјави Гаши.

Вчера на новинарско прашање дали СДСМ ќе предложи кандидат за претседател на Собранието или ќе го поддржи кандидатот на ДУИ, Јагода Шахпаска рече дека утре на продолжувањето на конститутивната седница на Собранието ќе биде соопштено она што претставува договор на 67 пратеници од новото парламентарно мнозинство околу кадровското решение за нов претседател на Собранието.

Пред два дена, портпаролот на ДУИ, Бујар Османи, изјави дека Талат Џафери ќе биде кандидат за претседател на Собранието за кој кажа дека има поддршка од парламентарното мнозинство.

Изборот на собраниски спикер ќе биде в понеделник, по изборот на состав на новата Комисија за избори и за именување. Според Уставот и деловникот на Собранието, претседателот на Собранието се изгласува со мнозинство, односно со 61 глас од пратениците.


Претседателот на Комисијата за избори и за именувања ќе биде од ВМРО-ДПМНЕ


Скопје, 23 март, 2017 - 14:40 (META) 

Парламентарните политички партии на денешната координација во Собранието договориле претседателот на Комисијата за избори и за именување да биде од редовите на ВМРО-ДПМНЕ, а конститутивната седница на Собранието да продолжи в понеделник.

Kоординаторот на пратеничката група на ВМРО-ДПМНЕ, Илија Димовски, рече дека името на претседателот на Комисијата ќе се знае во текот на денот. Сепак, извори од ВМРО-ДПМНЕ, за дел од медиумите потврдиле дека нејзин претседател најверојатно ќе биде токму Димовски.

– Претседателското место и шесте члена што ВМРО-ДПМНЕ ги доби во Комисијата за избори и за именувања не се добар гест од страна на СДСМ, туку се правила и практика според кои Собранието функционира 25 години. Доколку СДСМ продолжи да го слуша гласот на граѓаните кои секојдневно протестираат и доколку СДСМ продолжи со ваквите постапки со кои прифаќа дека е губитничка партија на изборите, Собранието ќе продолжи нормално да функционира – рече Димовски.

Димовски додаде дека в понеделник единствена точка за која ќе одлучува Собранието ќе биде изборот на составот на Комисијата за прашања за избори и именувања, а нема да се избере претседател на Собранието.

Генералниот секретар на СДСМ и пратеник, Оливер Спасовски, рече дека прифатиле претседателот на Комисијата да биде од редовите од ВМРО-ДПМНЕ за да се откочат процесите во државата.

– Ние прифативме претседателот на Комисијата да биде од ВМРО-ДПМНЕ за да се откочат процесите во Македонија, да профункционираат демократските процеси и законодавниот дом и граѓаните да не бидат заложници на кој било политичар или политичка партија. Сметам дека ова е потребно и добро затоа што многу штета трпат граѓаните и економијата – рече Спасовски.

Според договореното, ВМРО-ДПМНЕ ќе има шест члена во Комисијата за прашања на изборите и на именувањата, СДСМ – пет, а ДУИ и Беса по еден член.