Судењето за нападот на Села прекинато откако му се слоши на еден од обвинетите


Скопје, 18 април, 2018 - 14:00 (META) 

Судењето за нападот врз пратеникот Зијадин Села во Собранието на 27 април минатата година, денеска беше прекинато откако му се слоши на Никола Војневски, еден од десетината обвинети во овој предмет.

На Војневски му се слоши за време на сведочењето на новинарот Горан Трпеновски, по што беше повикана итна медицинска помош.

Трпеноски, како втор сведок на обвинителството, рече дека критичниот ден известувал од седница во Собранието, по што се упатил во прес-центарот каде требало да се оддржи прес-конференција по изборот на Талат Џафери за претседател на Парламентот. Според новинарот, Села бил удрен со метална шипка, по што се наведнал и потоа Села веќе не му бил во фокусот.

Трпеноски посочи дека од присутните обвинети во судницата го препознал само Александар Јаневски-Тошта, кој, како што рече, стоел во живиот ѕид пред пратениците и бранел.

Претходно, исказ даде Александар Стојкоски, поранешен пратеник, а сега доктор на Клиниката за радиологија во Скопје, кој е сведок на Обвинителството. И тој рече дека Тошта ги ги раздвојува луѓето околу Села, а тоа го охрабрило и тој да пристапи и да помогне во раздвојувањето.

За обидот за убиство на Зијадин Села на 27 април минатата година обвинети се Кире и Цеко Ѓорѓиевски, Оливер Ошавковски, Саша Сенков, Николче Димитриевски, Александар Јаневски – Тошта, Андреј Мицов, Никола Војминовски, Коста Делов и Стојан Павловски – Кобра.
Обвинетите за обид за убиство на пратеникот Зијадин Села на претходните рочишта се изјаснија за невини.


Само што почна, рочиштето за „Монструм“ се одложи за 15 мај


Скопје, 17 април, 2018 - 10:34 (META) 

Рочиштето за случајот „Монструм“ е одложено за 15 мај, поради отсуство на обвинетиот Фејзи Азири кој бил хоспитализиран на пулмологија. Денешното рочиште, кое беше прво откако СЈО го презеде предметот, беше прекинато на самиот почеток, на што реагираше обвинителката Фатиме Фетаи.

Таа истакна дека несериозно е, отсуството на обвинетиот да се правда само со еден документ дека е во болница, на што, судијата Огнен Ставрев одговори дека ќе побара целосна болничка документација за Азири.

На денешното рочиште присуствуваа и родителите на петмината убиени кај Смилковско езеро. Tаткото на едно од убиените момчиња, Горан Наќевски побарал од судијата стражарно да го приведе премиерот Зоран Заев, пишува sdk.mk. Тој рекол дека како политички противник на ДУИ им изнел конкретни докази за вмешаност на функционери од ДУИ во свирепото убиство.

Наќевски, под морална и кривична одговорност, изразил желба, неповикан, на денешното судење за предметот „Монструм“ да даде изјава, и судијата Ставрев му дозволил.

„Кога бевме кај Заев рече дека ќе ни даде шест разговори државна тајна за шест функционери на ДУИ. Но, подоцна тие станаа пет. ДУИ тогаш беше нивни противник. Заев ни ги покажа транскриптите, ни го посочи Невзат Бејта и ни покажа транскрипт од разговор меѓу Невзат Бејта и обвинетиот Фејзи Азири. Не го исполни ветувањето, од политички причини не ни ги даде тие 5 државни тајни“, рече Наќевски.

Тој во името на сите родители побарал да се изврши претрес во седиштето на СДСМ.

„Тврдам дека тие транскрипти се таму. Бараме да не соочите со премиерот Заев, дека не лажеме и не измислуваме. Стражарно приведете го, ќе го почекаме“, додаде Наќевски.

Судот не се изјаснил за барањата на родителите на убиените деца.


Продолжува судењето за нападот врз Села


Скопје, 16 април, 2018 - 10:59 (META) 

Во Основен суд Скопје 1, познат и како Кривичен суд, денеска треба да продолжи судењето на обвинетите за обидот за убиство на пратеникот Зијадин Села, што се случи на 27 април минатата година во Собранието.

На денешното рочиште се очекува да сведочат тројца сведоци, меѓу кои и пратеникoт на СДСМ, Мухамед Зекири.

На минатото судење, што траеше шест часа, беа сослушани тројца сведоци, претседателот на Собранието Талат Џафери, министерот за информатичко општество и администрација Дамјан Манчевски и пратеникот на СДСМ Александар Кирацовски.


Талат Џафери во судница препозна петмина од напаѓачите на Села


Скопје, 10 април, 2018 - 13:49 (META) 

Претседателот на Собранието, Талат Џафери како сведок за обидот за убиство на Зијадин Села во парламентот на 27 април лани, препозна пет од 10-те обвинети, кои на денешното судење во Основниот суд Скопје 1 беа донесени од притвор.

Џафери ги посочи обвинетите Стојан Павлески, Андреј Мицов, Николче Димитриевски, Кире Ѓорѓиевски и Оливер Ошавковски.

-Тие беа првите кои влегоа во прес-салата на Собранието и меѓу првите кои почнаа да ги напаѓаат присутните. Ова го тврдам со целосна одговорност – рече Џафери на прашање на адвокатот на оштетениот Зијадин Села, Абедин Абдули.

Претходно, собранискиот спикер сведочеше што зборувале напаѓачите во Собранието.

-Додека зборував кратко на мобилниот со фамилијата, Села го снема. Не беше до мене. Во салата не забележав видливи повреди кај Села. Помислив обезбедувањето го извлекло. Но, набргу некој од напаѓачите рече: Со Села завршивме, редот е на вас. Сите ќе потпишете изјави дека нема да го прифатите новото парламентарно мнозинство – рече Џафери.


Груевски, Јанакиески и Пешевски се изјаснија за невини во случајот „Траекторија“


Скопје, 1 март, 2018 - 11:41 (META) 

Кривичниот суд го одби барањето на поранешниот премиер Никола Груевски „бомбите“ да не бидат докази во случајот со провизии од кинеските автопатишта со што започнаа воведните говори во случајот на СЈО „Траекторија“.

Во судницата покрај Груевски присутни се и поранешниот вицепремиер Владимир Пешевски, екс министерот за транспорт и врски Миле Јанакиески и поранешниот директор на Агенцијата за државни патишта, Љупчо Георгиевски.

-Го прочитав и разбрав обвинението, но не сфатив за што сум обвинет. Кривичното дело наведено во обвинението не сум го сторил – рече Груевски, по што и другите обвинети се изјаснија дека не се чувствуваат виновни.

Судот го оцени како неоснован предлогот на Груевски СМС пораките да бидат отфрлени како докази. Груевски обвини дека пред да му бидат дадени на СЈО, пораките биле во рацете на СДСМ, која, како што рече, е политичка партија која е негов силен противник.

На почетокот на рочиштето судијата Горан Бошевски ги праша обвинетите дали има промена на податоците. Јанакиески кажа дека во моментов е вработен како раководител во „Пелистерка“, Пешевски се води како невработен и прима апанажа, Георгиевски е невработен, а Груевски е пратеник во Собранието.

Обвинителката од СЈО, Лиле Стефановска, рече дека повод за постапката против обвинетите е содржината на аудио материјалите, од што произлегува дека биле повредени процесите за водење на јавни набавки при градење на автопатите. Од нив се гледа, рече Стефановска, дека Јанакиески и Пешевски требало да потпишат незаконски договор со кинеска компанија за градење на автопатите.

– Од содржината на материјалните докази, вештачењата, сведочењата на лица, ќе докажеме дека обвинетиот Груевски мотивиран од „пет на целото“, како што слушнавме во објавените снимки, ја искористил службената положба и влијаел врз Пешевски и Јанакиески да извршат избор на компанијата што ќе ги гради автопатите, но без тендерска постапка – рече Стефанова.

Четворицата се обвинети дека во втората половина на 2012 година и во текот на 2013 година презеле повеќе дејствија со кои во постапката за избор на компанија за изградба на автопатите Миладиновци – Штип и Кичево – Охрид ги искористиле и пречекориле своите овластувања, со што му нанеле штета на државниот буџет од најмалку 155 милиони евра.


Одбраната на Јанакиески бара изземање на вештакот во „Топлик“, оти имал ќерка во СЈО


Скопје, 30 јануари, 2018 - 11:18 (META) 

Одбраната на обвинетите во случајот „Топлик“ на Специјалното јавно обвинителство (СЈО), во кој е осомничен и поранешниот министер за транспорт и врски Миле Јанакиески, бара да се изземе вештачењето на СЈО од доказите, бидејќи ќерката на вештакот работела во СЈО. Адвокатот, Јаким Наумов, рече дека поради оваа околност, постои конфликт на интереси помеѓу вештакот и СЈО.

Одбраната тврди дека вештачењето е пристрасно и необјективно и содржи „правно невистинити податоци“. Инаку, геодетското вештачење го изготвил сега актуелниот директор на агенција за катастар, Борис Тунџев. Судијата Осман Шабани, барањето за изземање го внесе во записникот.

Обвинителот на СЈО, Бурим Рустеми истакна дека приговорот на одбраната е неоснован, бидејќи според законот, изземање може да се бара ако вештакот е во работен однос со обвинетиот или оштетениот.

– Фактот дека ќерката на вештакот е вработена во СЈО нема основ – рече Рустеми.

Судијата соопшти дека Судечкиот совет ќе одлучи за барањето дополнително со решение на кое ќе биде дозволено право на жалба. Поради ова денешното рочиште се одложи за 8 март во 10 часот.

Инаку, одбраната бараше судот да одлучи за нивниот приговор, пред почетокот на главната расправа. Тие се повикаа на одлуката на судот во случајот на Зоран Заев, „Поткуп“ каде одбраната на премиерот бараше првин да се одлучи за изземањето на посебните истражни мерки, односно снимките што се објавени на „Јутјуб“, па потоа да почне главната расправа.

– Ако важи во случајот на Заев, треба да важи и овде – рече адвокатот Наумов, кој патем е еден од адвокатите на Заев во „Поткуп“.

Денеска се одложи и рочиштето „Труст“, бидејќи судијката Лидија Зимбовска била болна.


Обвинетите во „Тарифа“ се изјаснија за невини, СЈО бара осудителна пресуда


Скопје, 26 јануари, 2018 - 12:11 (META) 

Обвинетите Дејан Бошковски, Методиј Стојменовски и Ненад Ѓорѓовски во случајот на СЈО „Тарифа“ на денешното рочиште се изјаснија за невини, а обвинителите на СЈО бараат осудителна пресуда.

Предметот „Тарифа“ со новиот распоред на судења и е доделено на судијката Софче Гаврилова – Ефремова.

Според обвинителот од СЈО Трајче Пеливанов, доказите ќе докажат дека тројцата обвинети се сторители на кривично дело „злоупотреба на службената положба и овластување“.

– Злоупотребата на службената положба не е наивно кривично дело и не може да биде толериран – рече Пеливанов и додаде дека очекува Судот да донесе осудителна пресуда.

Пеливанов истакна дека обвинетите ја злоупотребиле службената положба за противзаконска набавка на софтверски систем за потребите на АД ЕЛЕМ со што и причиниле имотна штета на компанијата од 456.560 евра.

Бошковски рече дека не се чувствува виновен и дека во ниту еден момент од неговото работење во АД ЕЛЕМ од октомври 2012 до септември 2016 година не ги прекршил законите. Тој во своето обраќање до Судот, рече дека верува оти ќе овозможи фер судење, бидејќи непрецизно и нејасно е зошто е обвинет.

Според обвинението на СЈО, обвинетите ја злоупотребиле службената положба и овластувањето при јавна набавка на софтвер – „ЕРП систем“. Тие му овозможиле на конзорциумот, кој подоцна го добил тендерот, да се квалификува во втората фаза на преговарање при јавната набавка, иако немал доставено комплетна документација.


Новиот судски процес за петкратното убиство кај Смиљковско езеро почнува на 12 февруари


Скопје, 18 јануари, 2018 - 15:40 (META) 

На 12 февруари во Кривичниот суд е закажан почетокот на новиот судски процес за петкратното убиство кај Смиљковско езеро, за кое се обвинети шест лица.

Судењето за случајот „Монструм“ ќе го води судијата Огнен Ставрев, а процесот стартува од почеток откако Врховниот суд на барање на Вишото јавно обвинителство ги укина пресудите на Кривичниот и на Апелацискиот суд со кои шестемина обвинети беа осудени на доживотни затворски казни.

Јавната обвинителка Лилјана Спасоска на 3 октомври, минатата година на јавна седница во Врховниот суд побара укинување на пресудите и враќање на предметот на повторно судење, а како причина ги наведе „неутврдената фактичка состојба“, но и евентуално постоење на прислушувани разговори, кои ги поседува Специјалното јавно обвинителство, и кои би можеле да го сменат текот на постапката.

На 24 ноември 2017 година Врховниот суд ги укина пресудите за „Монструм“ и го врати случајот на повторно судење, а на 1 декември ги ослободи обвинетите Агим Исмаиловиќ, Фејзи Азири, Хаки Азири и Сами Љута од притвор и им одреди други мерки за претпазливост, односно забрана за напуштање на живеалиштето – Скопје и два пати неделно да се јавуваат во Кривичниот суд.

За останатите двајца обвинети Алил Демири и Африм Исмаиловиќ меѓународните потерници што беа распишани за нивно пронаоѓање и понатаму остануваат на сила.

Тие беа уапсени на Косово за поседување на оружје и по отслужувањето на двегодишната затворска каза беа пуштени на слобода, а косовските власти одбија да ги екстрадираат во Македонија.

Врховниот суд покрај укинувањето на пресудите даде многуборјни забелешки и насоки, поради што се очекува Обвинителството да направи измени и допрецизирања во обвинителниот акт за новиот судски процес.

На првото судење обвинениот на Обвинителството за гонење на организиран криминал и коруција го застапуваше обвинителката Гордана Ѓешковска.

Масакрот кај Смиљковското Езеро се случи на 12 април 2012 година, на Велики четврток, пред големиот христијански празник Велигден, кога беа убиени момчињата Кире Тричковски, Филип Славковски, Цветанчо Ацковски, Александар Наќевски и рибарот Борче Стефановски.


Судењето на напаѓачите на Села во Собранието закажано за 26 јануари


Скопје, 11 јануари, 2018 - 11:41 (META) 

На 26 јанаури Кривичниот суд го закажа почетокот на судењето на напаѓачите на лидерот на Алијанса за Албанците, Зијадин Села, кои се товарат за обид за убиство.

Села беше еден од најтешко повредените за време на насилствата во Собранието од 27 април.

Судењето, како што јавува „Телевизија 24“ ќе го води судијката Славица Андреевска.

За обидот за убиство на Села се обвинети 10 лица – Кире Ѓоргиевски, неговиот татко Цане Ѓоргиевски, Оливер Ошавковски, Сашо Сенков, Николче Димитриевски, Александар Јаневски-Тошта, Андреј Мицов, Никола Војминовски, Коста Делов и Стојан Павлески – Кобра.

Дел од напаѓачите беа идентификувани со помош на граѓаните, откако МВР на својата веб-страница објави кадри од снимки од настаните во Собранието на кои беа обвинетите.

Ова е трет предмет за насилставата од 27 април кој влегува во суд. Претходно, девет лица дбоја условни затворски казни поради учество во толпа што ќе спречи службено лице во вршење на службено дејствие. Другиот случај беше против напаѓачот на актуеланата министерка за одбрана, Радмила Шекеринска, кој беше осуден на четири години затвор.


Во Турција обвинети уште 2.700 државни службеници


Анкара, 24 декември, 2017 - 14:11 (META) 

Во Турција обвинети се уште 2.756 државни службеници поради наводна поврзаност со терористички групи, соопштија денеска турските власти.

Владата на Турција соопшти дека меѓу обвинетите се 637 припадници на војската, 360 припадници на жандармеријата, 150 професори и други припадници на академската заедница.

По минатогодишниот обид за државен удар во Турција, околу 50.000 лица се уапсени, а повеќе од 110.000 државни службеници се обвинети поради наводна поврзаност со терористички групи или со исламскиот проповедник Фетула Ѓулен кого турските власти го обвинуваат за организација на пучот.