!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Попоски во Брисел побара поголема присутност на претставниците на ЕУ во Македонија


Брисел, 21 ноември, 2017 - 18:22 (META) 

Пратениците Артан Груби, Никола Попоски и Фадил Зендели, вчера и денеска учествуваат на конференција посветена на интеграцијата на земјите од Западен Балкан во Европската Унија, која се одржува во Европскиот парламент во Брисел.

На конференцијата, како што соопштија од собраниската Комисија за европски прашања, особен акцент бил ставен на силната заинтересираност на Европската Унија за стабилизација на европскиот континент, при што било нагласено дека тоа нема да се постигне сè додека земјите од Западен Балкан не станат дел од Унијата.

Европратениците на конференцијата испратиле порака дека проширувањето на Унијата ќе продолжи и дека земјите од Западен Балкан во согласност со степенот на реализација и на исполнување на неопходните критериуми имаат јасна перспектива во наредниот период да се приклучат кон ова семејство.

Пратеникот Груби, како што се наведува во соопштението, ги информирал европратениците за текот на реформскиот процес во Македонија, за посветеноста на новото мнозинство да ги зацврсти поставените задачи од Брисел за до крајот на годината да се добие безусловна препорака за почеток на преговори, па дури и конкретен датум за нив.

Пратеникот Попоски упатил апел до претставниците на Унијата за поголема нивна присутност во Република Македонија, како и за поголема соработка на сите земји од регионот во поглед на европската агенда.

– Успехот во интеграцијата зависи од можноста за поголема контрола на Владата од страна на Собранието – рече Попоски.


Медениот месец на Владата заврши, препораките на Прибе останаа, порача Попоски


Скопје, 20 септември, 2017 - 16:07 (META) 

Корисно е практиките од првите 100 дена на Владата да се напуштат во пресрет на реформите за кои е неопходен национален консензус, рече пратеникот на ВМРО-ДПМНЕ, Никола Попоски, на денешната седница на Националниот совет за европски прашања при Собранието на Република Македонија, на која беше конституиран новиот состав.

– Владиниот меден месец заврши, препораките од извештајот на Прибе останаа. Европската Унија ни наметнува потреба од отворен дијалог дома, длабински реформи со најширока поддршка и реална примена на правилата. Протрчување без издржана дебата не е добро ниту за државата ниту за тој што го промовира таквиот пристап. Владата не може да сонува за мандат без контролни механизми, а опозицијата е тука да поддржи добри решенија за најбрз почеток на преговорите за членство во ЕУ – истакна Попоски, кој е претседател на Советот за европски интеграции.

На денешата седница беа присутни и вицепремиерот за европски прашања, Бујар Османи, како и амбасадорот на Европската Унија во земјава, Самуел Жбогар, кој ги нагласи очекувањата за постигнување најширок можен консензус во однос на реформите кои се неопходни за членство во ЕУ.


Попоски: Сакавме да постигнеме реципроцитет за сите точки од договорот со Бугарија


Скопје, 30 јули, 2017 - 12:54 (META) 

Поранешниот министер за надворешни работи, Никола Попоски, наведува дека претходната влада во преговорите со Бугарија настојувала да постигне рамноправност и реципроцитет за сите точки од договорот.

– На ниво на работни групи, текстот го доби денешниот костур, со пет или шест празни полиња. За секое такво поле имаше по неколку варијанти на македонски и бугарски предлози, кои се разликуваа. На крај, идејата беше за овие полиња да се постигне компромис или можеби да се изостават целосно. За илустрација, тоа би значело: ако едните сакаат да се спомнува заедничка историја со комисии, а другите бараат јазик без релативизирање со устав, да се прифатат двете забелешки. Спротивно, ако остане јазикот според устав, оти така било во изјавата од 1999 година, тогаш да нема ни заедничка историја со комисии, оти истите ги нема во истата таа изјава од 1999 година. Тоа би било во европски дух и буквално, компромис – вели Попоски во интервјуто за „Прес 24“.

Според Попоски, инсистирањето на официјална Софија за историските комисии во договорот има цел таа да си обезбеди простор за идни блокади на Македонија при процесот за членство во ЕУ.

– За историската комисија, веројатно намената е да се стави во погон паралелно со пристапните преговори за членство во ЕУ. Идејното решение е таа комисија да прерасне во некое наше чистилиште на патот кон просветление. Колку побргу ќе се просветлуваме, толку поблиску ќе е членството – вели Попоски.

Тој истакнува дека на Македонија мора да покаже дека е добар домаќин и посетата на бугарскиот премиер Бојко Борисов закажана за 1 и 2 август мора да помине без какви било инциденти за да не го нарушиме нашиот беспрекорен имиџ на гостопримство.


СДСМ апелира ВМРО-ДПМНЕ да го поддржи договорот за добрососедство


Скопје, 27 јули, 2017 - 15:23 (META) 

Договорот за пријателство, добрососедство и за соработка помеѓу Република Македонија и Република Бугарија е во согласност со националните интереси на Република Македонија и одговара на интересите на граѓаните и на Македонија и на Бугарија, порача СДСМ денеска, во реакција на прес-конференцијата на Никола Попоски од ВМРО-ДПМНЕ.

Владејачката партија порачува дека со договорот се нагласува дека постојат два посебни народа, со што се затвора едно важно прашање.

„Со договорот се реафирмира позицијата дека се работи за две посебни држави, два посебни народи и два посебни јазика, се затвора прашањето што непотребно одвлекува внимание и енергија, се забрзува процесот на интеграција во ЕУ и во НАТО,  а Македонија станува пример за соработка во Југоисточна Европа. Успехот за постигнатиот договор е заеднички на сите граѓани, партии и за сите досегашни влади, бидејки новата влада го финализира процесот што е почнат во 2009 година, од кога се одржани 10 заеднички состаноци на комисии меѓу Република Македонија и Република Бугарија“, се вели во реакцијата од СДСМ.


Попоски: За поддршка од ВМРО-ДПМНЕ, договорот со Бугарија ќе мора да се коригира


Скопје, 27 јули, 2017 - 14:33 (META) 

Поранешниот министер за надворешни работи и сегашен пратеник од редовите на ВМРО-ДПМНЕ, Никола Попоски, денеска на прес-конференција во Собранието изјави дека Владата излегла во пресрет на барањата на Софија за договорот за добрососедство, но дека се добива впечаток дека ги заборавила македонските интереси.

– Станува збор за меѓудржавен договор, но специфично е тоа што има определено оспорување на посебноста на македонскиот јазик и на македонскиот народ како нација. За да добие поддршка во Собранието од ВМРО-ДПМНЕ, ќе мора да има корекции во делот на националните интереси – истакна Попоски.

Поранешниот министер за надворешни работи смета дека е потребен фер договор кој ќе затвора проблеми, а не договор кој ќе креира фрустрација на патот на Македонија кон ЕУ. Таков фер договор, според него, ќе биде основа за добивање најширока поддршка во Собранието и чувствата во јавноста ќе бидат дека со него се добива, а не се губи.


Попоски положи цвеќе на гробот на Св. Кирил во Рим


Рим, 24 мај, 2017 - 16:21 (META) 

Во рамките на манифестацијата „Македонија во чест на Св. Кирил“, министерот за надворешни работи во заминување, Никола Попоски, денеска, во Рим, ја предводеше државно црковната делегација на молебенот на гробот на Св. Кирил во базиликата „Сан Клементе“.

Во присуство на бројни гости, со молебенот, на гробот на Светителот, чиноначалствуваа митрополитот дебарско – кичевски Тимотеј и митрополитот Европски Пимен. Традиционалната манифестација „Македонија во чест на Св. Кирил“ на 25 мај годинава ќе биде збогатена со настап на музичката група Баклава, која во Рим ќе ја претстави македонската изворна музичка традиција.

Министерот Никола Попоски, на 26 мај, како дел од државно – црковната делегацијапредводена од претседателот Ѓорге Иванов, ќе присуствува на аудиенцијата кај Папата Франциск, а веднаш потоа ќе го придружува претседателот Иванов на средбата со Државниот секретар на Светата Столица, кардиналот Пиетро Паролин, во Апостолската Палата.


Македонска делегација во Рим во чест на свети Кирил


Скопје, 24 мај, 2017 - 10:37 (META) 

Државно-црковна делегација од Република Македонија денеска ќе се поклони на гробот на свети Кирил во Рим, во рамки на традиционалната манифестација „Македонија во чест на свети Кирил“. Делегацијата ќе ја предводи министерот за надворешни работи во заминување Никола Попоски, а со молебенот на гробот на светителот ќе чиноначалствуваат митрополитот дебарско-кичевски Тимотеј и митрополитот европски Пимен.

Претседателот на државата Ѓорге Иванов во Рим ќе престојува во петок и ќе ја предводи државно-црковната делегација на аудиенцијата кај папата Франциск. Иванов заедно со Попоски во петок во Апостолската палата ќе има средба и со државниот секретар на Светата столица, кардиналот Пиетро Паролин.

Традиционалната манифестација „Македонија во чест на Св. Кирил“ на 25 мај годинава ќе биде збогатена со настап на музичката група Баклава, која во Рим ќе ја претстави македонската изворна музичка традиција.

Користејќи го говорот на македонските Словени од околината на неговиот роден Солун, кој го знаел од детството, Константин ја составил првата словенска азбука – глаголица со 38 букви. Говорот на македонските Словени го издигнал на ниво на прв книжевен јазик.

Во 11 век Црквата го прогласила 24 мај (11 мај по стар стил) за ден на светите просветители Кирил и Методиј. Денот во Македонија првпат бил одбележан на 11 мај 1860 година во црквата Св. Богородица во Скопје.


Попоски утре на манифестацијата „Македонија за св.Кирил“


Рим, 23 мај, 2017 - 13:47 (META) 

Министерот за надворешни работи во заминување, Никола Попоски утре ќе ја предводи државно црковната делегација на гробот на Свети Кирил во базиликата „Сан Клементе“ во Рим со кој ќе чиноначалствуваат митрополитот дебарско – кичевски Тимотеј и митрополитот европски Пимен, при што ќе положи цвеќе на гробот на светителот.

Попоски заедно со претседателот Ѓорге Иванов на 26 мај, како дел од државно – црковната делегација, ќе присуствуваат на аудиенцијата кај Папата Франциск, а веднаш потоа ќе имаат средба со Државниот секретар на Светата Столица, кардиналот Пиетро Паролин, во Апостолската Палата.

Традиционалната манифестација „Македонија во чест на Св. Кирил“ на 25 мај годинава ќе биде збогатена со настап на музичката група „Баклава“, која во Рим ќе ја претстави македонската изворна музичка традиција.

Попоски утре ќе присуствува и на неформалниот состанок на министрите за надворешни работи од земјите од Западен Балкан на покана од италијанскиот министер за надворешни работи, Анџелино Алфано.


ВМРО-ДПМНЕ: СЈО му помага на Заев да реализира нарачани платформи


Скопје, 22 мај, 2017 - 17:46 (META) 

На прес-конференција денеска дури тројца високи функционери на ВМРО-ДПМНЕ одговараа на наводите што денеска ги изнесе СЈО отворајќи три нови случаи, од кои два „Талир“ и „Траекторија“ се за претседателот на ВМРО-ДПМНЕ и за високи партиски или државни функционери во владите на ВМРО-ДПМНЕ.

Антонијо Милошоски од партиската говорница обвини дека СЈО само „штанца обвиненија против ВМРО-ДПМНЕ“ за да му помогне на претседателот на СДСМ и мандатар за нова влада, Зоран Заев во „спроведување нарачани платформи“.

– Од пресот на СЈО се забележуваат две цели. Првата цел е најава за притисок врз судството отворена политичка најава за силен притисок врз судството што ќе следува во наредниот период. И втората цел преку таквиот притисок врз судствоот да се издејствуваат судски пресуди кои што се веќе дел од некој политички или коалиционен договор.  Таквата најава денес СЈО ја соопшти преку соопштувањето на случајот Сопот – рече Милошоски, наведувајќи дека потоа би уследиле идентични постапки и за случаите „Монструм“ и „Диво насеље“.

За случајот „Траекторија“ зборуваше Никола Попоски, кој рече дека не е точно дека била нанесена материјална штета од 155 милиони евра, оти станувало збор за капитален проект од кој корист имаат сите граѓани на Македонија. Тој рече и дека за двата автопати, односно Миладиновци – Штип и Кичево – Охрид не се применувал Законот за јавни набавки затоа што во Собранието во 2013 година, и со гласови на пратеници од СДСМ и од ДУИ, бил изгласан Законот за реализацијата на двата инфраструктурни проекти, кој пак се засновал на Законот за рафирикација на договорот за економска и техничка соработка во инфраструктурата меѓу владите на Македонија и на Кина. Тој негираше и дека во игра била само една понуда.

– Третата инсинуација во денешниот настап на СЈО е дека се преговарало со само една компанија и не била избрана најниската понуда. Вистината е следна, склучени се меморандуми со две компании и тоа: China International Water and Electric Corpоration (CWE) и Sinohydro Corporation Limited. Двете компании доставиле свои понуди и во 2013-та година е одбрана најниската понуда – рече Никола Попоски.

За случајот „Талир“, за незаконско финансирање на ВМРО-ДПМНЕ одговараше Емил Димитриев, генерален секретар на партијата и технички премиер. И тој обвини дека отворањето на случаите од СЈО е уште еден напад врз ВМРО-ДПМНЕ, порачувајќи дека партијата не работела незаконски, што било „потврдено од страна на сите институции надлежни за проверка на финансиското работење на политичките партии“.

– Јасно и гласно со чест и со достоинство порачуваме дека ова нема да помине. Финансирањето на ВМРО-ДПМНЕ е реализирано согласно закон, целокупниот имот на ВМРО-ДПМНЕ е законски стекнат. Имотот на ВМРО-ДПМНЕ се користи за извршување на партиските функции.ВМРО-ДПМНЕ има право да има простор за свое функционирање. СДС не може и не смее да биде во привилегирана позиција и да има простор за функционирање кој му оставен од поранешната комунистичка партија. А, ВМРО-ДПМНЕ да нема простор. Сиот имот на партијата е законски стекнат и без разлика дали е во целост оспособен за партиско функционирање како што е отприлика 95% од просторот или пак е во тек постапка за оспособување на просторот како што имаме 4-5 ситуации – рече Димитриев.


Џафери и Јанева се сретнале со делегација на Конгресот на САД


Скопје, 11 мај, 2017 - 20:30 (META) 

Делегацијата на претставници на Конгресот на Соединетите Американски Држави, која денеска беше во посета на земјава, имала средби и со новоизбраниот претседател на Собранието на Република Македонија, Талат Џафери, и со специјалната јавна обвинителка, Катица Јанева, соопштија од Амбасадата во САД во Македонија.

„Двопартиската делегација, предводена од конгресменот Боб Гудлејт, претседател на Комитетот за правосудство, се сретна со претседателот на Собранието, Талат Џафери, со пратеници и со специјалната јавна обвинителка, Катица Јанева. Делегацијата исто така се сретна со министерот за одбрана, Зоран Јолевски, и со министерот за надворешни работи, Никола Попоски, во касарната „Илинден“, каде Воената полиција ја презентираше опремата финансирана од САД“, стои во соопштението на Амбасадата.

На состаноците, како што информираат оттаму, се разговарало за зајакнување на владеењето на правото во Македонија, за воената соработка и за процесот на формирање влада.

Инаку, посетата на делегацијата на Конгресот на САД на земјава е во рамките на нивната регионална турнеја во текот на која се разговара за различни прашања, вклучувајќи ја демократската политичка клима и економскиот пораст на Балканот.